|
12.03.2010
12 მარტს ნატო-ს შტაბბინაში, ნატო-საქართველოს კომისიის ფარგლებში ჩრდილოატლანტიკური საბჭო შეიკრიბება - საქართველოს ვიცე-პრემიერი გიორგი ბარამიძე 2010 წლის ეროვნულ პროგრამას წარადგენს; რეინტეგრაციის საკითხებში სახელმწიფო მინისტრი თემურ იაკობაშვილი კი, ოკუპირებული ტერიტორიების მიმართ სახელმწიფო სტრატეგიას. ამავე დღეს ხელი მოეწერება ნატო-ს ნდობის ფონდის პროექტს ომის ფეთქებადი ნარჩენების გაუვნებელყოფის შესახებ. საქართველოს მხრიდან პროექტს ხელს მოაწერს ვიცე-პრემიერი. ბარამიძე ორმხრივ შეხვედრებს გამართავს ნატო-ს გენერალური მდივნის მოადგილე კლაუდიო ბიზონიეროსთან და ალიანსში ლატვიის, ლიტვის, ჩეხეთის, ნიდერლანდების ელჩებთან. საქართველოს დელეგაციამ 2010 წლის ეროვნული პროგრამა პირველადი განხილვისთვის მიმდინარე წლის იანვარში წარადგინა. დოკუმენტი დადებითად შეფასდა, გამოითქვა შენიშვნები და რეკომენდაციები. მათი გათვალისწინების შედეგად, საბოლოო ვარიანტი სახელმწიფო კომისიამ 9 თებერვალს დაამტკიცა.
|
