"ენგურჰესისა" და "ვარდნილჰესისთვის" საქართველოს ხელისუფლება გამონაკლისს დაუშვებს და ოკუპირებულ ტერიტორიაზე ეკონომიკური საქმიანობის შესაძლებლობას მისცემს. ენერგეტიკის მინისტრ ალექსანდრე ხეთაგურის თქმით, იმისთვის, რომ ეს კომპანიები კანონის მიღმა არ აღმოჩნდნენ, მთავრობამ შესაბამისი განკარგულება გამოსცა. შეგახსენებთ, რომ კანონით, ოკუპირებული ტერიტორიების შესახებ, რომელიც პარლამენტმა  მიიღო, რუსეთის მიერ ოკუპირებულ და საქართველოს ხელისულების მიერ ვერკონტროლირებად ტერიტორიებზე კომპანიებს ეკონომიკური საქმიანობა ეკრძალებათ.

თბილისში, უზნაძის ქ. #2-ში დღეს ახლადგარემონტებული ქორწინების სახლის გახსნის საზეიმო ცერემონია გაიმართება. ღონისძიებაზე მიწვეულნი არიან საქართველოს მთავრობისა და პარლამენტის წევრები, თბილისის მერი, არასამთავრობო, დონორი ორგანიზაციების, საქართველოში აკრედიტებული დიპლომატიური კორპუსის წარმომადგენლები და სხვები.
ქორწინების სახლში განთავსებულია ორი სხვადასხვა დიზაინის სარიტუალო  დარბაზი.  სამოქალაქო რეესტრის სააგენტო მუშაობს ქორწინების რიტუალის თანამედროვე, განსხვავებულ ფორმაზე - არჩევანს წყვილი გააკეთებს.

გერმანიის ქალაქ დრეზდენში გამართული რიგით 38-ე საჭადრაკო ოლიმპიადა საქართველოს მოჭადრაკე ქალთა ნაკრების ტრიუმფალური გამარჯვებით დასრულდა - მათ ჩემპიონის ტიტული მე-4-ედ მოიპოვეს. განსაკუთრებით აღსანიშნავია მსოფლიოს 5-გზის ჩემპიონის - მაია ჩიბურდანიძის საუცხოო თამაში; მან მცირე ოქროს მედალი მოიპოვა და 15 ოლიმპიადიდან 9-გზის ჩემპიონი გახდა, რაც ჭადრაკის ისტორიაში უნიკალური მოვლენაა. ვაჟები - მხოლოდ ბერგერის კოეფიციენტის დაბალი მაჩვენებლის გამო - მე-11 ადგილს დასჯერდნენ. დაბოლოს, ნონა გაფრინდაშვილის სახელობის თასზე, სადაც ქალთა და ვაჟთა ჯამური შედეგია გადამწყვეტი, საქართველოს ნაკრები მე-4 ადგილზე გავიდა.

საქართველოს პრეზიდენტი დღეს  საერთაშორისო კონკურს "ევროვიზია ჯუნიორის" წლევანდელ გამარჯვებულ ჯგუფ "ბზიკებს" შეხვდება. მიხეილ სააკაშვილი მარიამ კიკუაშვილს, მარიამ თათულაშვილსა და გიორგი შიოლაშვილს ავლაბრის რეზიდენციაში მიიღებს და დააჯილდოებს. ისინი "საბავშვო ევროვიზია 2008"-ის გამარჯვებულნი 22 ნოემბერს გახდნენ. 15 ქვეყანას შორის, რომლებმაც ქართულ ჯგუფს უმაღლესი შეფასებები მისცეს, რუსეთი, ბელორუსია და ლიტვა იყვნენ. 

ნიუ-იორკსა და სიეტლში ქართული ღვინის დღეები მოეწყობა. მასზე დასასწრებად სოფლის მეურნეობის მინისტრი ბაკურ კვეზერელი აშშ-ში გაემგზავრა. პრეზენტაციაზე წარმოდგენილი იქნება რვა ქართული ღვინის მწარმოებელი კომპანია - "თბილღვინო," "სარაჯიშვილი," "მილდიანი," "ვინოტერრა," "თელიანი ველი," "ქინძმარაული," "თელავის ღვინის მარანი" და "ბაგრატიონი". ქართული ღვინის დღეებში მონაწილეობის სურვილი უკვე გამოთქვეს სომელიეებმა, რესტორნების და საცალო ქსელის წარმომადგენლებმა, ღვინის დისტრიბუტორმა კომპანიებმა და ამერიკულმა გამოცემებმა.

სასტუმრო "თბილისი მარიოტში" ბორჯომის წყალმომარაგების სისტემის რეაბილიტაციის პროექტის პრეზენტაცია გაიმართება. შესაბამის ხელშეკრულებას ხელს ფინანსთა მინისტრი ნიკა გილაური, ეკონომიკური განვითარების მინისტრი ეკატერინე შარაშიძე, ევროპის რეკონსტრუქციისა და განვითარების ბანკის დირექტორი კავკასიაში მაიკლ დეივი, საქართველოს ათასწლეულის ფონდის აღმასრულებელი დირექტორი გიორგი აბდუშელიშვილი და  საქართველოს მუნიციპალური განვითარების ფონდის აღმასრულებელი დირექტორი ლაშა გოცირიძე მოაწერენ.

ვანის რაიონის სოფელ სალხინოში მდებარე სულორის მცირე ჰიდროელექტროსადგურის რეაბილიტაცია დასრულდა. აშშ-ის ელჩი ჯონ ტეფტი და საქართველოს მთავრობის წარმომადგენლები ხვალ ჰიდროელექტროსადგურის საზეიმო გახსნაში მიიღებენ მონაწილეობას. მცირე ჰიდროელექტროსადგური 1953 წელს გაიხსნა და 1987 წლამდე ფუნქციონირებდა. მისი მუშაობა ეკონომიკური ვარდნისა და ჰესის აქტივების ძარცვის შედეგად შეწყდა. 2007 წლის მარტში კი, მოხდა ელექტროსადგურს პრივატიზაცია შპს "სულორიჰესი"-ს მიერ.

ლონდონის კულტურის ცენტრში მომღერალ მაია ბარათაშვილის სოლო კონცერტი გაიმართა, რომლის ინიციატორი და ორგანიზატორი ბრიტანულ-ქართული სავაჭრო პალატა და ბრიტანულ-ქართული საზოგადოება იყო. კონცერტის დეტალებს მომღერალი ჟურნალისტებს "შერატონ მეტეხი პალასში" გააცნობს. 

ოსურ სოფელ ხევჩუაში განლაგებული ოსური საგუშაგოდან მსხვილკალიბრიანი ნაღმტყორცნიდან ქართულ სოფელ მერეთის პოლიციის განყოფილებას ესროლეს.
ამის შესახებ ოფიციალურ ინფორმაციას საქართველოს შინაგან საქმეთა სამინისტრო ავრცელებს. სამინისტროს ცნობით, დაზიანდა პოლიციის უკან მდებარე ნაგებობა,  პოლიციის შენობაში კი, აფეთქების შედეგად, ჩამტვრეულია შუშები. მსხვერპლი არ არის.

ქართველმა კადეტმა კალათბურთელებმა ესპანეთის ქალაქ ისკარის საერთაშორისო  ტურნირი მოუგებლად დაასრულეს. ქვეჯგუფში თურქეთის ნაკრებთან 62:82, ხორვატიასთან 50:91 და კასტილიის ნაკრებთან (ესპანეთის "B" ნაკრებთან) კიდევ უფრო დიდი სხვაობით განცდილი მარცხის შემდეგ, გია კაზანჯიანის დამოძღვრილი ქართველი 16-წლამდელები მეორე ჯგუფის ბოლოადგილოსან პორტუგალიელ თანატოლებს დაუპირისპირდნენ და დაძაბულ ბრძოლაში 71:74 დამარცხდნენ.

დღეს საქართველოს ფეხბურთის ფედერაციაში აღმასრულებელი კომიტეტის სხდომა შედგა. სფფ-ის აღმასრულებელმა კომიტეტმა დაადგინა:

1.სფფ-ის გენერალურ მდივნად დაინიშნა რევაზ არველაძე, ხოლო სფფ-ის აღმასრულებელი კომიტეტის წევრად და მეორე ვიცე-პრეზიდენტად - უჩა უგულავა.

2.საქართველოს ახალგაზრდული ნაკრების მთავარ მწვრთნელ პეტარ სეგრტს კონტრაქტი არ გაუხანგრძლივდება. 21-წლამდელთა ნაკრების, ისევე როგორც 19 და 17-წლამდელთა ნაკრებების, მთავარი მწვრთნელებისა და ასისტენტების დანიშვნასთან დაკავშირებით სფფ-ის აღმასრულებელი კომიტეტი მიმდინარე თვეში შეიკრიბება.

3.სფფ-ის აღმასრულებელ კომიტეტში შესული მამუკა კვარაცხელიას წერილის თაობაზე, რომელიც საქართველოს ეროვნულ ჩემპიონატსა და დავით ყიფიანის სახელობის საქართველოს თასის მატჩებზე სასკოლო ასაკის ფეხბურთელების უფასოდ დაშვების საკითხს შეეხებოდა, სფფ-ის აღმასრულებელმა კომიტეტმა დაადგინა: საქართველოს პროფესიული ფეხბურთის ლიგას დაევალოს საკითხის შესწავლა და სფფ-ის აღმასრულებელი კომიტეტისთვის შესაბამისი პასუხის მიწოდება.

თბილისის ზაქარია ფალიაშვილის სახელობის ოპერისა და ბალეტის თეატრში ბუბა კიკაბიძის სამოცდაათი წლისთავისადმი მიძღვნილი საიუბილეო კონცერტები გაიმართება, რომელსაც რეჟისორი დათო დოიაშვილი მხატვარ შმაგი სავანელთან ერთად დგამს; ასევე - "მიმინოს" პერსონაჟების სკულპტურული კომპოზიცია გაიხსნება, რომლის ავტორიც ზურაბ წერეთელია.

კოტე მარჯანიშვილის სახელობის სახელმწიფო დრამატული თეატრის შესასვლელთან რიგით მეოთხე, გურანდა გაბუნიას სახელობის ვარსკვლავი გაიხსნა; გაიმართა მსახიობის საღამო, რომელზეც მან შეასრულა ნაწყვეტები ოთხი სპექტაკლიდან, თავის მუდმივ პარტნიორებთან ერთად, მათ შორის - მეუღლესთან, ოთარ მეღვინეთუხუცესთან.

saqarTvelos erovnuli muzeumis auditoriaSi italiis arqeologiuri memkvidreobis, lacios regionis xelmZRvanelis, doqtor analiza zaratinis leqcia Catardeba. leqciis Temaa kulturuli memkvidreobis prevenciuli arqeologia. aRniSnuli Sexvedra xorcieldeba saqarTvelos erovnuli muzeumiს proeqtis farglebSi, romelic arqeologiis sferoSi momuSave specialistebsa da studentebs saerTaSoriso arqeologiuri kvlevebis uaxles meTodebს გააცნობს.

საქართველოს სუპერლიგის ერთ-ერთმა გამორჩეულმა  კლუბმა - "თსუ"-მ ისე ჩაამთავრა შეჯიბრის პირველი წრე, რომ მოთამაშეებს 1 თვის ხელფასიც კი არ მიუღიათ. "თსუ"-ს პრეზიდენტის განცხადებით, კლუბმა სასურველი სპონსორის მოძიება ვერ შესძლო, რის გამოც ნებისმიერ მოთამაშეს გუნდის ცვლის შესაძლებლობა დაუბრკოლებლად ეძლევა. იგი იტოვებს იმედს, რომ "თსუ", გუნდში დარჩენილი თუნდაც ახალგაზრდა, გამოუცდელი მოთამაშეებით, მაინც შესძლებს მიმდინარე ჩემპიონატის დასრულებას.

რაგბის საერთაშორისო საბჭომ თავისი წევრი ქვეყნების ეროვნულ ნაკრებთა ახალი საკვალიფიკაციო მაჩვენებლები გამოაქვეყნა, რომლის თანახმად - საქართველოს ეროვნული  ნაკრები 2008 წელს მე-14 პოზიციაზე ასრულებს, პლანეტის მოწინავე გუნდად კი, კვლავ ახალი ზელანდიის ეროვნული ნაკრები რჩება.

არაბი ინვესტორი - კომპანია "მაქსიმალის" გენერალური დირექტორი ჰალიდ ალ ამაირე საქართველოში ახალი სერვისის დანერგვასთან და საინვესტიციო გეგმებთან დაკავშირებით პრესკონფერენციას "შერატონ  მეტეხი  პალასში" მართავს. ბრენდი "მაქსიმალი" შპს "ვიტელ ჰოლდინგსის" შვილობილი კომპანიის - შპს "ვიტელ ჯორჯიას" სავაჭრო ნიშანს წარმოადგენს. შპს "ვიტელ ჰოლდინგსი" მრავალეროვნული კორპორაციაა, რომელიც სატელეკომუნიკაციო სფეროში მონაცემთა გადაცემის, ხმისა და მობილური სერვისების პროვაიდერი, უმსხვილესი მრავალპროფილიანი მოთამაშეა. საქართველოში ქსელის შექმნისა და ფუნქციონირების ლიცენზია "ვიტელ ჯორჯიამ" 2007 წლის სექტემბერში შეიძინა და ამ დროისთვის 25 მლნ დოლარამდე ინვესტიცია განახორციელა. მისი სერვისი, ჯერჯერობით, მხოლოდ ბათუმში ჩაირთო.

ცნობილი ფრანგი კომპოზიტორი მიშელ ლეგრანი, მეუღლესთან, დასთან და ორ მუსიკოსთან ერთად, თბილისს ეწვევა. მაესტროს სოლო კონცერტი 21 დეკემბერს თბილისის ოპერისა და ბალეტის თეატრში გაიმართება. მის ცნობილ ნაწარმოებებს ეროვნული სიმფონიური ორკესტრი ნიკა მემანიშვილის დირიჟორობით შეასრულებს. მიშელ ლეგრანი დედაქალაქს და მის შემოგარენს დაათვალიერებს, შეხვდება სრულიად საქართველოს კათოლიკოს-პატრიარქს, ასევე - დაესწრება "სუხიშვილების" კონცერტს.  

საქართველოს იუსტიციის სამინისტროს ეროვნულ არქივში გამოფენა "ქართული კინო 100 წლისაა" გაიხსნება. ექსპოზიციაზე წარმოდგენილი იქნება ქართული მხატვრული და დოკუმენტური  კინოს ცნობილი რეჟისორების, ოპერატორების, სცენარისტებისა და მსახიობების ფოტო და წერილობითი მასალა; ნაჩვენები იქნება კინოკადრები ქართული ფილმებიდან.

კახი კალაძის კომპანია "კალა კაპიტალში" შემავალ "არსენალ დეველოპმენტს" საპრივატიზაციო ხელშეკრულების დარღვევისთვის ბიუჯეტის სასარგებლოდ 931 080 აშშ დოლარის ჯარიმა ეკისრება, რომელიც კომპანიას ავლაბარში მდებარე ყოფილი სამხედრო ბაზა "არსენალის" ღირებულების (38 მლნ აშშ დოლარი) გადაუხდელობის გამო დაეკისრა. "კალა კაპიტალმა" პირველ ეტაპზე 19 მლნ აშშ დოლარი გადაიხადა, დანარჩენი თანხა კი, 2012 წლამდე, ეტაპობრივად უნდა დაეფარა. ეკონომიკის სამინისტრო "კალა კაპიტალთან" ხელშეკრულების პირობების გადახედვაზე მოლაპარაკებებს აწარმოებს. კახი კალაძე მთავრობას "არსენალის" პროექტის 2 წლით გადავადებას და თანხის დაფარვის ვადის გახანგრძლივებას სთხოვს. "არსენალის" პროექტის განხორციელება 2010 წლიდან უნდა დაწყებულიყო, თუმცა პროექტის გადავადება ფორსმაჟორით არის განპირობებული, რაც გლობალური ფინანსური კრიზისის შედეგია. 

ეკონომიკური განვითარების მინისტრმა განაცხადა, რომ არის კიდევ ბევრი კომპანია, რომელიც სახელმწიფოს წინაშე აღებულ ვალდებულებებს არ ასრულებს. ლაშა ჟვანიას განმარტებით, სამინისტროში შეიქმნება მონიტორინგის სპეციალური სამსახური, რომელიც პრობლემურ საინვესტიციო ხელშეკრულებებს შეისწავლის. "გლობალური ფინანსური კრიზისის პირობებში, მთავრობა არ დაუშვებს ქვეყნიდან ინვესტიციების გადინებას და შევეცდებით, რომ თითოეულ ინვესტორთან შეთანხმებას მივაღწიოთ", - განმარტა მინისტრმა.

საქართველომ საერთაშორისო სავალუტო ფონდის მეორე ტრანშის მიღებაზე უარი განაცხადა. ფონდის მიერ გამოყოფილი 726 მილიონიდან, წელს შესაძლებელი იყო 100 მილიონის მიღება, თუმცა მთავრობამ ამ ეტაპზე მორიგი კრედიტის მიღება მიზანშეწონილად არ ჩათვალა. როგორც ფინანსთა მინისტრი აცხადებს, ამ დროისთვის ქვეყანას საკმარისი საერთაშორისო რეზერვები გააჩნია; ეს მაჩვენებელი იგივეა, რაც წლის დასაწყისისთვის იყო და იგი 1,4 მლრდ აშშ დოლარს შეადგენს. როგორც ნიკა გილაური განმარტავს, ქვეყანას ამ თანხის ათვისება, საჭიროების შემთხვევაში, 2009 წლის იანვარში შეუძლია. 726 მილიონიდან 250 საქართველომ უკვე მიიღო და საერთაშორისო სავალუტო რეზერვების შესავსებად მიმართა.

სავალუტო ფონდში კი - საქართველოს მთავრობის ეკონომიკურ პოლიტიკას დადებითად აფასებენ, თუმცა, როგორც ყოველთვის, რეკომენდაციებსაც იძლევიან. საერთაშორისო დახმარების წყალობით, მთავრობა კაპიტალური ხარჯების ზრდას და არაპროდუქტიული ხარჯების შემცირებას იმედოვნებს. მონეტარული პოლიტიკა მიმართული იქნება ინფლაციის დონის შენარჩუნებაზე; ამ მხრივ ყურადღება მიექცევა საპროცენტო განაკვეთის კორექტირებას, სავალუტო გაცვლითი კურსის ლიბერალიზაციის ფონზე. საერთაშორისო საფინანსო ინსტიტუტებიდან მიღებული ფინანსური დახმარება ხელს შეუწყობს კომერციულ ბანკებს, გადაიხადონ საგარეო გადასახადები, რომელთა დაფარვის ვადა ახლოვდება.

მსოფლიოს წამყვან ეკონომისტთა გაერთიანების პროგნოზით, 2009 წელს მშპ-ს ზრდის ტემპის მიხედვით საქართველო მსოფლიოში მეხუთე ადგილს დაიკავებს და ზრდის მაჩვენებელი 8%-ს მიაღწევს. ექსპერტთა გათვლებით, საქართველოს ამ მაჩვენებლის მიღწევაში დასავლური ინვესტიციები დაეხმარება.

"NBA"-ის რეგულარულ ჩემპიონატში ზაზა ფაჩულიას "ატლანტა ჰოუქსმა" რიგით მე-18 გამარჯვება მოიპოვა. "ქორებმა" "ოკლაჰომა სითის" სძლიეს და მე-4 პოზიცია გაიმყარეს. ზაზა ფაჩულიამ 18 წუთი დაჰყო მოედანზე და ესოდენ მწირი დროის მიუხედავად, 8 ქულა, 4 მოხსნა და 2  შედეგიანი გადაცემა განახორციელა.

ეკონომიკის მინისტრი ლაშა ჟვანია მომავალი წლიდან საინვესტიციო პროგრამებზე მონიტორინგის გამკაცრებას გეგმავს. როგორც მან ჯანდაცვის საპარლამენტო კომიტეტის დღევანდელ სხდომაზე განაცხადა, ეკონომიკის სამინისტროში, ჯერჯერობით, საინვესტიციო პროგრამების მონიტორინგზე ორი ადამიანი მუშაობს, რაც აბსოლუტურად უშედეგოა. მინისტრი უწყებაში შესაბამისი დეპარტამენტის ჩამოყალიბებას გეგმავს.

მთავარი საახალწლო ღონისძიება თბილისში, თავისუფლების მოედანზე გაიმართება. გალა კონცერტში ქართული შოუბიზნესის წარმომადგენლები მიიღებენ მონაწილეობას. თბილისის ცენტრი - თავისუფლების მოედნიდან ვარდების მოედნამდე - ზღაპრულ პერსონაჟებს, მუსიკოსებსა და საკარნავალოდ გამოწყობილ მსახიობებს დაეთმობათ; როგორც ორგანიზატორები აცხადებენ, დაგეგმილია რამდენიმე სიურპრიზი, დედაქალაქის მასშტაბით კი - კიდევ რამდენიმე ღონისძიება და ფოლკლორული ანსამბლების კონცერტი.

"ლეიბორისტულმა პარტიამ" საქართველოს პრეზიდენტის იმპიჩმენტის მოთხოვნით პარლამენტში მიმართვა შეიტანა. "მივმართავთ საქართველოს პარლამენტის წევრებს, აღასრულონ თავიანთი მოვალეობები ერისა და ხალხის წინაშე; ხელი მოაწერონ ამ დოკუმენტს, წინააღმდეგ შემთხვევაში, მიხეილ სააკაშვილთან ერთად, მათი პასუხისმგებლობის საკითხიც დადგება", - განაცხადა პარტიის პოლიტიკურმა მდივანმა, გიორგი გუგავამ.

პოლიტიკურმა და ეკონომიკურმა პრობლემებმა, რომელსაც მსოფლიო 2008 წელს შეეჯახა, რუსეთ-ამერიკის პარტნიორობის აუცილებლობა და მნიშვნელობა დაადასტურა, აღნიშნულია დიმიტრი მედვედევის მიერ ბუშისადმი გაგზავნილ მისალოც ბარათში - "ვაფასებთ, რომ უკანასკნელ წლებში, ჩვენს ქვეყნებს შორის ურთიერთობებში ბევრი პოზიტიური დაგროვდა. ამოცანას იმაში ვხედავთ, რომ ამაზე დაყრდნობით, ახალ დონეზე თანამშრომლობა გავაფართოვოთ, როგორც ამას რუსეთისა და ამერიკის საფუძვლიანი ინტერესები მოითხოვს".

ლტოლვილთა და განსახლების მინისტრმა და კერძო კომპანიების წარმომადგენლებმა კასპის რაიონის სოფელ თელიანში ჩასახლებული დაზარალებული მოსახლეობა მოინახულეს. სტუმრებმა დევნილებს "ვისოლის" მიერ შეძენილი თონეები ჩაუტანეს. კომპანია "შირნჰოფერმა" კი, დაზარალებულებს საკუთარი პროდუქცია გადასცა. სოფელ თელიანში, რუსული აგრესიის შედეგად დაზარალებული მოსახლეობისთვის აშენებულ სახლებში, 54 ოჯახი ცხოვრობს.

ჯონდი ბაღათურიას განცხადებით, მშენებლობის ბიზნესის შეჩერების შემდეგ, გადაზიდვების ბიზნესიც გაჩერდა. იგი დაინტერესდა, ხომ არ გეგმავს სახელმწიფო ამ დარგის კომპენსირებას. დეპუტატმა ბანკებში შექმნილ პრობლემებზეც ისაუბრა და ასევე დაინტერესდა, რა ღონისძიებებს ატარებს სახელმწიფო ბანკებიდან თანამშრომლების გათავისუფლების აღსაკვეთად. ფინანსთა მინისტრის განცხადებით, სახელმწიფო ამ საკითხებში ვერ ჩაერევა, გამოსავალი კი, თავად კერძო სექტორის გააქტიურებაა - "დამატებით შეღავათებს არ ვგეგმავთ რომელიმე კონკრეტული სექტორის მიმართულებით, თავად ბინზესს შეუძლია გააქტიურდეს და კონკურენტუნარიანი გახდეს".

საქართველოს პრეზიდენტი საქართველოს მოსახლეობას ახალ წელს ქუთაისიდან მიულოცავს. მიხეილ სააკაშვილი გუშინ ქალაქს მოულოდნელად ეტუმრა და საახალწლოდ მორთული ღამის ქუთაისი დაათვალიერა, ასევე - რეაბილიტირებული ისტორიული ნაწილი და ახლადაშენებული ბავშვთა სოფელი, სადაც ორი კვირის განმავლობაში პატარებისთვის საახალწლო ღონისძიებები მოეწყობა. პრეზიდენტი კმაყოფილი დარჩა განათების იმ თანამედროვე სისტემით, რომელიც ქუთაისის მერიამ ცოტა ხნის წინ შეიძინა.

საპარლამენტო ფრაქცია "ქრისტიან-დემოკრატები" მომავალი წლის ბიუჯეტს მხარს არ უჭერს; ამის შესახებ ფრაქციის ლიდერმა, გიორგი თარგამაძემ დღევანდელ რიგგარეშე სესიაზე სიტყვით გამოსვლისას განაცხადა. შენიშვნების მიუხედავად, ფრაქციამ პროექტის დადებითი მხარეებიც შენიშნა; დეპუტატმა კმაყოფილება გამოთქვა, რომ გათვალისწინებულია კარდიოლოგიური ქირურგიის დაფინანსება, რაც ოპოზიციის მოთხოვნას წარმოადგენდა, ასევე - უნარშეზღუდული პირებისა და სოციალური პროგრამების დაფინანსება, საპატრიარქოს დაფინანსების ზრდა და 1 მლნ ადამიანის დაზღვევა.

გიორგი თარგამაძისთვის, ინიცირებული საკონსტიტუციო ცვლილებების ფონზე, რომლითაც მთავრობა პარლამენტის წინაშე უფრო ანგარიშვალდებული ხდება, მოულოდნელი იყო ბიუჯეტის პროექტის პრემიერის გარეშე განხილვა - "ეს პარლამენტის იგნორირებად და უპატივცემულობად მიმაჩნია".

ანტიკრიზისული საბჭო საარჩევნო კოდექსსა და ადგილობრივი თვითმმართველობის კანონზე დაიწყებს მუშაობას. შემაჯამებელ პრესკონფერენციაზე, საბჭოს თავმჯდომარე გია თორთლაძემ სამი თვის განმავლობაში გაწეული მუშაობისა და სამომავლო გეგმების შესახებ დეტალურად ისაუბრა. უახლოეს პერიოდში საბჭო, სამინისტროებიდან მოწოდებული ინფორმაციების საფუძველზე, საერთაშორისო დახმარებების ხარჯვის და გადანაწილების მონიტორინგს განახორციელებს.

დედაქალაქში დაგეგმილ საახალწლო ღონისძიებებთან დაკავშირებით, 24:00-დან 03:00 საათამდე თბილისის მეტროპოლიტენი მგზავრებს უფასოდ მოემსახურება. ადმინისტრაციაში აცხადებენ, რომ დროის აღნიშნულ მონაკვეთში მატარებლები 7-10 წუთის ინტერვალით იმოძრავებენ.

გუდაურის სათხილამურო ტრასა მთლიანად განათდება, დამსვენებლებს შესაძლებლობა ექნებათ, საახალწლო ღამე მხიარულ და სასიამოვნო გარემოში გაატარონ. სასტუმრო "გუდაურის" მიმდებარე ტერიტორიაზე დაინთება საზეიმო კოცონი, რომელიც იქ მისულ სტუმრებს სადღესასწაულო განწყობას შეუქმნის; ასევე - დაგეგმილია არაერთი კონცერტი და ღონისძიება იმ ბავშვებისთვის, რომლებიც ახალგორიდან და ცხინვალის რეგიონიდან არიან ჩასახლებულნი. გუდაურში მობილიზებულია პოლიციისა და ჯანდაცვის სამსახურები - 24-საათიანი მომსახურებით, მზადყოფნაშია სამაშველო ჯგუფები, შეზღუდვების გარეშე ხდება ელექტროენერგიისა და გაზის მიწოდება ყველა ობიექტზე. აგრეთვე, საგზაო დეპარტამენტი უზრუნველყოფს გზების გაწმენდას.

გრიგოლ მგალობლიშვილი გერმანიაში ჯანმრთელობის გაუარესების გამო გაემგზავრა. "პრემიერის სამშობლოში დაბრუნების ზუსტ თარიღს ვერ გეტყვით. შესაძლოა, 4-5 დღეშიც დაბრუნდეს.  მას კომპლექსური სამედიცინო გამოკვლევა უტარდება და დიაგნოზის დასმას ელოდება", - განაცხადა პრემიერის პრეს-სამსახურის უფროსმა, ავთანდილ ფავლენიშვილმა. მისი თქმით, გრიგოლ მგალობლიშვილს გერმანიაში მეუღლე ახლავს.

"ჩვენ არ ვაპირებთ, უარი ვთქვათ საკუთარ გეგმებზე კავკასიაში და მთლიანად დსთ-ს სივრცეში", - ეს განცხადება რუსეთის საგარეო საქმეთა მინისტრმა რუსული მედიისთვის მიცემულ ინტერვიუში გააკეთა. სერგეი ლავროვმა საქართველოში განხორციელებული აგრესიის გამართლება კიდევ ერთხელ სცადა და აღნიშნა, რომ ეს იყო პროვოკაცია პირველ რიგში რუსეთის წინააღმდეგ, რომელიც დაიგეგმა რუსეთისთვის გეოპოლიტიკურად ყველაზე პრიორიტეტულ სივრცეში - დსთ-ში. "რუსეთის ფედერაციამ ჩაშალა გეგმა, რომელიც მიზნად ისახავდა დამატებითი გამაღიზიანებელი ფაქტორების შექმნას რუსეთისა და მეზობელი ქვეყნების ურთიერთობაში. პარალელურად, თანამეგობრობის  სივრცეში საკუთარი პოლიტიკის რეალიზებას, რაც სერიოზულად შელახავდა რუსეთის ინტერესებს", - განაცხადა მინისტრმა, თუმცა არ დააზუსტა, კონკრეტულად ვინ დაგეგმა ე. წ. პროვოკაცია. მან, აგრეთვე, ცეცხლის შეწყვეტის შესახებ ხელშეკრულების დარღვევაში საქართველო დაადანაშაულა.

საქართველოს საგარეო საქმეთა სამინისტრომ სერგეი ლავროვის საპასუხო განცხადება გაავრცელა, რომელშიც გაკვირვებას გამოხატავს  რუსეთის ცინიკურ მოქმედებასთან დაკავშირებით, დაადანაშაულოს საქართველო 12 აგვისტოს ცეცხლის შეწყვეტის შესახებ შეთანხმების დარღვევაში. საგარეო უწყებას სურს შეახსენოს მინისტრს, რომ საქართველო პირნათლად ასრულებს აღნიშნული შეთანხმებით აღებულ ყველა ვალდებულებას, რაც დასტურდება ყველა საერთაშორისო სადამკვირვებლო მისიის ანგარიშებით.

ბუბა კიკაბიძემ რუსული გაზეთისთვის მიცემულ ინტერვიუში განაცხადა, რომ აგვისტოს ომის შემდეგ სამეგრელოში ჩამოყრილ პროკლამაციებში მიხეილ სააკაშვილის შემცვლელად ნინო ბურჯანაძე იყო დასახელებული. მომღერალი მიიჩნევს, რომ "ეს რუსეთის მხრიდან საქართველოს შიდა საქმეებში უხეში ჩარევაა" და შიშობს, რომ შესაძლოა, მიხეილ სააკაშვილის მკვლელობა შეუკვეთონ - "მომწონს თუ არა სააკაშვილი, ეს ჩემი პრობლემაა. მე არასდროს გავაკრიტიკებ სხვა ქვეყნის ხელისუფალს, ვინაიდან ეს შეურაცხმყოფელია უშუალოდ იმ ხალხისა და მათი არჩევანის. პუტინმა უკვე შეიძინა ახალი სახელი, მას "რუსეთის პრეზიდენტის სააქციო საზოგადოების გენერალურ დირექტორს" უწოდებენ. სადამდე გაგრძელდება ასეთი დამოკიდებულება ჩვენი ქვეყნის მიმართ, არ ვიცი. ვშიშობ, რომ შესაძლოა, მიხეილ სააკაშვილის მკვლელობა შეუკვეთონ".

საქართველო-ამერიკის შეერთებულ შტატებს შორის სტრატეგიული თანამშრომლობის ქარტიას 9 იანვარს, ვაშინგტონში აშშ-ს სახელმწიფო მდივანი კონდოლიზა რაისი და საქართველოს საგარეო საქმეთა მინისტრი გრიგოლ ვაშაძე მოაწერენ ხელს. საქართველოში აშშ-ის საგანგებო და სრულუფლებიანი ელჩის, ჯონ ტეფტის განცხადებით, ახლო აღმოსავლეთში ვითარების უკიდურესად გართულების გამო, შეთანხმების ხელმოწერა, რომელიც 4 იანვარს უნდა გამართულიყო, რამდენიმე დღით გადაიდო.

საქართველოს შინაგან საქმეთა სამინისტროს სახელმწიფო საქვეუწყებო დაწესებულება - სასაზღვრო პოლიციის საავიაციო ქვედანაყოფები თავდაცვის სამინისტროს გადაეცა; შესაბამის ბრძანებულებას პრეზიდენტმა ხელი მოაწერა. თავდაცვის სამინისტრომ უნდა უზრუნველყოს ქვედანაყოფების სამხედრო მოსამსახურეების მიერ სამხედრო სამსახურის გაგრძელება საქართველოს შეიარაღებული ძალების შემადგენლობაში, შსს-მ და თავდაცვის სამინისტროებმა კი, ეკონომიკური განვითარების სამინისტროსთან ერთად - გადაცემული ქვედანაყოფების ბალანსზე რიცხული საშტატო ქონების, შეიარაღებისა და მატერიალურ-ტექნიკური ბაზის თავდაცვის უწყების ბალანსზე გადაცემა.

ევროპის გაზით მომარაგების საკითხს დღეს ბრიუსელში განიხილავენ. როგორც ევროკავშირის თავმჯდომარე ქვეყნის, ჩეხეთის წარმომადგენელმა, ალექსანდრ ვონდრმა განაცხადა, ორგანიზაცია რუსეთსა და უკრაინას შორის გაზთან დაკავშირებულ კონფლიქტში რომელიმე მხარის პოზიციის დაჭერას არ გეგმავს - "ეს არის კომერციული დავა. ჩვენ არ ვიცით კონტრაქტის დეტალები, რომლებიც კონფიდენციალურია". მან მოუწოდა მხარეებს, კონფლიქტი რაც შეიძლება სწრაფად მოაგვარონ. უკრაინისთვის რუსული გაზის შეწყვეტის შემდეგ, ბუნებრივი აირის მიწოდების მნიშვნელოვნად შემცირების შესახებ რუმინეთმა, უნგრეთმა და პოლონეთმა განაცხადეს. რუსეთმა უკრაინას გაზის მიწოდება 2009 წლის პირველ იანვარს შეუწყვიტა და ოფიციალურ მიზეზად 2008 წლის ნოემბერ-დეკემბერში დაგროვილი დავალიანება დაასახელა. "გაზპრომი" უკრაინას გაზის ახალ ფასს - 450 აშშ დოლარს სთავაზობს და აპირებს, სატრანზიტო პირობების შეუსრულებლობის მოტივით, უკრაინას სტოკჰოლმის საარბიტრაჟო სასამართლოში უჩივლოს.

ეუთო-ს ახალი, მოქმედი თავმჯდომარე და საბერძნეთის საგარეო საქმეთა მინისტრი დორა ბაკოიანისი საქართველოში ვიზიტს გეგმავს, რომელიც ორგანიზაციის თავმჯდომარის პოსტს ოფიციალურად 15 იანვრიდან დაიკავებს - შვედეთის საგარეო საქმეთა მინისტრ ალექსანდრ სტუბს შეცვლის. ცრემონიის დროს იგი ეუთო-ს თავმჯდომარე ქვეყნად საბერძნეთის ყოფნის პერიოდში ორგანიზაციის პრიორიტეტებს გაახმიანებს.   

4 იანვარს, 08:00 საათზე გალის რაიონის სოფელ განმუხურში მდებარე ქართული პოლიციის საგუშაგოს ცეცხლი გაუხსნეს რუსეთის საოკუპაციო ძალების მიერ კონტროლირებადი ტერიტორიიდან. სროლა განხორციელდა გალის რაიონის სოფელ ფიჩორიდან როგორც ავტომატური იარაღის, ისე ყუმბარმტყორცნების გამოყენებით. ინციდენტის შედეგად არავინ დაშავებულა.

საქართველოს საგარეო საქმეთა სამინისტრო განმუხურში მომხდარ ინციდენტს ეხმაურება. საგარეო უწყების მიერ გავრცელებულ განცხადებაში კიდევ ერთხელაა აღნიშნული, რომ აფხაზეთისა და ცხინვალის რეგიონების მიმდებარე ტერიტორიებზე, რუსეთის მხარისა და მისი მარიონეტული რეჟიმების მიერ ხორციელდება თავხედური თავდასხმები, რომელთა მიზანს ქართული მხარის პროვოცირება და რეგიონში არსებული ვითარების კიდევ უფრო დაძაბვა წარმოადგენს. ქართული მხარე კვლავ ხაზგასმით აღნიშნავს, რომ რუსულმა მხარემ სრულფასოვნად უნდა შეასრულოს 12 აგვისტოს ცეცხლის შეწყვეტის შესახებ შეთანხმება და მოახდინოს აფხაზეთისა და ცხინვალის რეგიონების სრული დეოკუპაცია. საქართველოს საგარეო საქმეთა სამინისტრო გამოხატავს თავის მტკიცე პროტესტს ქართული მხარის წინააღმდეგ განხორციელებულ მორიგ პროვოკაციასთან დაკავშირებით და იმედს გამოთქვამს, რომ საერთაშორისო საზოგადოებასთან ერთობლივი ძალისხმევით შესაძლებელი გახდება რეგიონებში უსაფრთხოების მყარი გარანტიების უზრუნველყოფა და უკონტროლო, სახიფათო მოვლენების განვითარების თავიდან აცილება.

პაატა დავითაიამ განმუხურის ინციდენტის კომენტირებისას განაცხადა, რომ "რუსეთს კონფლიქტის დარეგულირება არ სურს და აუცილებელია ევროკავშირის მანდატის გაფართოება, რათა სადამკვირვებლო მისიას ადმინისტრაციულ საზღვარზე მონიტორინგის განხორციელების შესაძლებლობა მიეცეს". მისი განცხადებით, "პროვოკაციებმა სისტემატიური ხასიათი მიიღო".

სამხედრო სავალდებულო სამსახურში საგაზაფხულო გაწვევა დაიწყო. საქართველოს პრეზიდენტის 2008 წლის 31 დეკემბრის ბრძანებულების თანახმად, გაწვევა 2009 წლის 5 იანვრიდან დაიწყო და 2009 წლის პირველ აგვისტომდე გაგრძელდება. შინაგან საქმეთა სამინისტროს დაქვემდებარებულ გასამხედროებულ დანაყოფებში გასაწვევთა რაოდენობა 1500-ით განისაზღვრა, სასჯელაღსრულების დეპარტამენტში კი - 340-ით. გაწვეული იქნებიან 18-დან 27 წლამდე ასაკის მოქალაქეები, რომლებსაც არ აქვთ სამხედრო სავალდებულო სამსახურში გაწვევისგან გათავისუფლების ან გადავადების უფლება.

დიდთოვლობის გამო, კვლავ რთული ვითარებაა მესტიაში - ვერ ხერხდება დაზიანებული სადენების შეკეთება, რის გამოც რაიონი, რამდენიმე დღეა, უშუქოდაა დარჩენილი. ასევე - შეუძლებელია გზის გაწმენდა. საგზაო დეპარტამენტი და ენერგეტიკოსები ყველაფერს აკეთებენ, რომ ვითარება რაც შეიძლება მალე გამოსწორდეს. სინოპტიკოსების პროგნოზით, მესტიაში ხვალაც მოთოვს.

როგორც "ენერგო-პრო ჯორჯიაში" განაცხადეს, ამ დროისთვის ელექტროენერგიის მიწოდება იმერეთის, რაჭის, ცაგერისა და ლენტეხის სოფლებში სრულად არის აღდგენილი. კომპანიის ტექნიკური სამსახურის განცხადებით, ამინდის გამოსწორების შემთხვევაში, ზემო სვანეთისთვის ელექტროენერგიის მიწოდება დღის ბოლომდე აღდგება.

კავკასიაში კონფლიქტის დაძლევის მიზნით შექმნილი ქართულ-რუსული კომისიის სხდომა თებერვალში გაიმართება; კომისიის წევრები საქართველო-რუსეთს შორის საჰაერო მიმოსვლისა და სავიზო რეჟიმის აღდგენის საკითხებზე იმსჯელებენ. მამუკა არეშიძის განცხადებით, შეხვედრაზე საუბარი ჰუმანიტარულ, დევნილთა მდგომარეობის, ახალგორში ჩასვლისა და ტყვეთა გაცვლის საკითხებს შეეხება - "დელეგაციაში ცნობილი ონიშჩენკოს წარმომადგენელი იქნება, რომელთანაც ქართულ ღვინოსთან დაკავშირებითაც ვისაუბრებთ".

"უკრაინისთვის გაზის მიწოდების აღსადგენად აუცილებელია, "გაზპრომსა" და "ნეფტგაზს" შორის ევროპული საბაზრო ფასით, ფასდაკლებისა და შეღავათების გარეშე ახალი კონტრაქტი გაფორმდეს", ამის შესახებ რუსეთის ფედერაციის პრეზიდენტმა 7 იანვარს, უკრაინის პრეზიდენტთან სატელეფონო საუბრისას განაცხადა. მან აღნიშნა, რომ ევროპელი მომხმარებლებისთვის გაზის მიწოდებისა და რუსეთსა და უკრაინას შორის ამ სფეროში თანამშრომლობის საკითხები არა პოლიტიკური, არამედ - ეკონომიკური ვალდებულების შესრულებაა. "სამწუხაროდ, პრობლემის მიზეზი უკრაინის ხელისუფლებაში არსებული უთანხმოებები და შექმნილ სიტუაციაში ადეკვატური გადაწყვეტილებების მიღების უუნარობა გახდა", - განაცხადა დიმიტრი მედვედევმა. 

"გაზპრომისა" და "ნეფტგაზის" ხელმძღვანელებმა, ალექსეი მილერმა და ოლეგ დუბინმა, მოლაპარაკებები მოსკოვში გამართეს. რუსული კომპანიის ოფიციალური წარმომადგენლის, სერგეი კუპრიანოვის განცხადებით, მხარეებმა უკრაინის ტერიტორიაზე გაზის მიწოდების საკითხი და შექმნილი კრიზისული მდგომარეობიდან გამოსვლის გზები განიხილეს. შეხვედრის სხვა დეტალები მას არ დაუკონკრეტებია. მოლაპარაკებების შემდეგი რაუნდი დღეს გაიმართება; მხარეები ერთმანეთს ბრიუსელში, ევროკავშირის შუამავლობით შეხვდებიან. კომპანიებს უკრაინის ტერიტორიაზე გაზის მიწოდების შესახებ კონტრაქტი არ აქვთ. ამის გამო, რუსულმა მხარემ იანვრის დასაწყისში უკრაინისთვის გაზის მიწოდება შეწყვიტა და მხოლოდ ევროპისთვის ტრანზიტი დატოვა ძალაში, 7 იანვარს კი - აღნიშნული მიწოდებაც შეწყვიტა და ევროპის დიდი ნაწილი გაზის გარეშე დატოვა. შედეგად, რუმინეთში საგანგებო მდგომარეობაა გამოცხადებული - ბუნებრივი აირის მარაგები ამოწურულია. ბულგარეთში გაზის კრიზისი უკვე რიგით მოქალაქეებზე აისახა - ათასობით ადამიანმა ღამე ცენტრალური გათბობის გარეშე გაატარა. მოსახლეობა პანიკამ მოიცვა - ჰაერის ტემპერატურა მინუს 5 გრადუსს აღწევს. მომარაგება სასიცოცხლო მნიშვნელობის ობიექტებსაც შეუწყდა, რის გამოც, სოფიაში დღეს საბავშვო ბაღებისა და სკოლების უმრავლესობა არ გაიხსნება. უნგრეთსაც ანალოგიური პერსპექტივა ელოდება; კრიზისის თავიდან ასაცილებლად და მოსახლეობის გაზით უზრუნველსაყოფად, მთავრობამ ბუნებრივი აირის გერმანიისგან შეძენის თაობაზე კონტრაქტი უკვე გააფორმა. პოლონეთშიც საკმაოდ მძიმე ვითარებაა - გაზმომარაგება ათობით უმსხვილეს საწარმოს შეუწყდა, რასაც მათი გაჩერება მოჰყვა.

საქართველოს საგარეო საქმეთა მინისტრი გრიგოლ ვაშაძე და აშშ-ს სახელმწიფო მდივანი კონდოლიზა რაისი ორ ქვეყანას შორის სტრატეგიული პარტნიორობის შესახებ ხელშეკრულებას ვაშინგტონში მოაწერენ ხელს, რომელიც ითვალისწინებს თანამშრომლობის გაფართოებას თავდაცვის, უსაფრთხოების, ეკონომიკის, ენერგეტიკის, დემოკრატიული რეფორმების, დიპლომატიისა და კულტურის სფეროებში.

ქართული მხარე კიდევ ერთხელ, ხაზგასმით აცხადებს, რომ აღნიშნული ჩარჩო-ხელშეკრულება საქართველოში ამერიკული სამხედრო ბაზების განთავსებას არ ითვალისწინებს. საპარლამენტო უმრავლესობის ერთ-ერთი ლიდერის, აკაკი მინაშვილის განცხადებით, "შეთანხმების მთავარი პუნქტი უსაფრთხოების სფეროში თანამშრომლობას გულისხმობს, თუმცა ბაზებზე საუბარი ჯერ ნაადრევია". საქართველოს პარლამენტში არ გამორიცხავენ, რომ დროთა განმავლობაში აღნიშნული საკითხი აქტუალური გახდეს და აქვე დასძენენ, რომ "მისი გადაწყვეტა საკანონმდებლო ორგანოს გარეშე შეუძლებელია".  

საქართველოს პარლამენტის თავმჯდომარე დავით ბაქრაძე აცხადებს, რომ "დოკუმენტი არ გულისხმობს ამერიკული ბაზების განლაგებას საქართველოს ტერიტორიაზე; ჩვენი ამოცანაა, გავაძლიეროთ ქართული არმია. საქართველო უნდა დაიცვას ქართულმა არმიამ და არა რომელიმე სხვა ქვეყნის ჯარმა ან ბაზამ, რომელიც აქ იქნება განლაგებული. დოკუმენტში საუბარი იქნება იმაზე, რომ აშშ გააგრძელებს საქართველოს დახმარებას თავდაცვისუნარიანობის განმტკიცების კუთხით". დავით ბაქრაძემ ეს განცხადება მას შემდეგ გააკეთა, რაც "ლეიბორისტულმა პარტიამ" მიხეილ სააკაშვილის ადმინისტრაციას ამერიკული ბაზების საქართველოში განთავსების მცდელობაში დასდო ბრალი.

საქართველოს ენერგეტიკის მინისტრმა რაჭაში ის ადგილები დაათვალიერა, სადაც სტიქიამ მაღალი ძაბვის სადენები დააზიანა. დიდთოვლობის გამო, ნაქერალას უღელტეხილსა და ონის რაიონის სოფელ ზუდალაში სადენები გაწყდა; იქ "ენერგო-პრო ჯორჯიას" ბრიგადები მუშაობენ. ალექსანდრე ხეთაგურის თქმით, მიუხედავად ცუდი კლიმატური პირობებისა, ონი, ამბროლაური, ცაგერი და ლენტეხი ელექტროენერგიას დღეს საღამოს მიიღებს. მინისტრმა ცხინვალის გაზით მომარაგებაზე გააკეთა განცხადება; მისი თქმით, შეკეთდა გაზსადენის დაზიანებული მილების ნაწილი, რადგან ოკუპირებულ ტერიტორიაზე უსაფრთხოების ზომები დაცული არ არის. 

აშშ-ის სახელმწიფო მდივნის თანაშემწე მეთიუ ბრაიზას განცხადებით, საქართველოსა და აშშ-ს შორის ორმხრივი თანამშრომლობის შესახებ ხელშეკრულებას ჯორჯ ბუშის პრეზიდენტობის ვადის ამოწურვამდე აუცილებლად მოეწერება ხელი. მისი განმარტებით, "ხელშეკრულების გაფორმება ახლო აღმოსავლეთში მოვლენების განვითარებაზეა დამოკიდებული და ღაზას სექტორში სიტუაციის კიდევ უფრო დაძაბვის შემთხვევაში, მისი გაფორმება, შესაძლოა, ისევ გადაიდოს".

საქართველოს სახელმწიფო მინისტრი რეინტეგრაციის საკითხებში თემურ იაკობაშვილი კატეგორიულად უარყოფს ოსი სეპარატისტების მტკიცებას, ქართული მხარის მიერ ფართომასშტაბიანი პროვოკაციის მზადების თაობაზე - "სეპარატისტების მიერ გავრცელებული ინფორმაცია სიმართლეს არ შეესაბამება. იქ იმყოფებიან რუსი ოკუპანტები, რომლებიც ევროკავშირის სადამკვირვებლო მისიას კონფლიქტის ზონაში არ უშვებენ.  კიდევ ერთხელ მოვითხოვთ მათ კონფლიქტურ რეგიონებში შეშვებას, რათა ყველა მსგავსი პროვოკაციული განცხადება აღიკვეთოს". დე ფაქტო ბეჭდვითი და მასობრივი კომუნიკაციების სამინისტროს მიერ გავრცელებული განცხადების თანახმად, ქართული მხარე უახლოეს მომავალში ე. წ. სამხრეთ ოსეთის ტერიტორიაზე მყოფი რუსეთის თავდაცვის სამინისტროს სამხედრო მოსამსახურეების წინააღმდეგ ფართომასშტაბიან შეიარაღებულ პროვოკაციას ამზადებს.

"იტერა-საქართველო" ცხინვალის რეგიონისთვის გაზის მისაწოდებლად მზად არ არის; ამის შესახებ კომპანიის გენერალური დირექტორის მოადგილე ირაკლი ნიკოლაიშვილმა განაცხადა. მისი თქმით, მიმდინარე თვეში ცხინვალისთვის მისაწოდებელი გაზის მოცულობა გათვალისწინებული არ არის - "სამწუხაროდ, "გაზპრომის" მიერ გაჟღერებული ინფორმაცია სიმართლეს არ შეესაბამება. კომპანიას გაზსადენის დაზიანების ადგილზე მისვლის საშუალება, უფლება არ აქვს". ცხინვალს და ახალგორის რაიონს ბუნებრივი აირი აგვისტოს შემდეგ არ მიეწოდება. "გაზპრომის" ხელმძღვანელმა, ალექსეი მილერმა გუშინ რუსეთის პრემიერ-მინისტრ ვლადიმერ პუტინთან შეხვედრაზე განაცხადა, რომ საქართველომ ცხინვალის რეგიონისთვის გაზის მიწოდებაზე მზადყოფნა გამოთქვა. ქართული მხარის ინფორმაციით, დაზიანებულია გაზსადენი, რომელთანაც მისვლას ქართველი სპეციალისტები ვერ ახერხებენ.

აფხაზური მხარის მიერ კონტროლირებადი გალის რაიონის სოფელ ოტობაიადან, ზუგდიდის რაიონის სოფელ ორსანტიას მიმართულებით, ავტომატური ყუმბარმტყორცნიდან 15 გასროლა განხორციელდა; ამის შესახებ ოფიციალური ინფორმაცია საქართველოს შს სამინისტრომ გაავრცელა. სამინისტროს ცნობით, ნასროლი ჭურვები ჩამოცვივდა სოფელ ორსანტიაში, კერძოდ - ქვარაიების ეზოში; მსხვერპლი არ არის, მიმდინარეობს განაღმვითი სამუშაოები. მომხდართან დაკავშირებით, საქმის კურსში არიან ევროკავშირისა და გაერო-ს სადამკვირვებლო მისიის წარმომადგენლები.

კორუფციის წინააღმდეგ ბრძოლის უწყებათაშორისი საბჭო, რომელიც პრეზიდენტის ბრძანებით შეიქმნა, მუშაობას იწყებს. აღნიშნული კომისია საქართველოს ეროვნული ანტიკორუფციული სტრატეგიის განახლებისა და მისი განხორციელების სამოქმედო გეგმას შეიმუშავებს, ასევე - კონტროლს გაუწევს გეგმის განხორციელებას. საბჭოს თავმჯდომარე იუსტიციის მინისტრი ზურაბ ადეიშვილი იქნება, წევრები კი - პრემიერ-მინისტრის მთავარი მრჩეველი ვახტანგ ლეჟავა, მთავრობის კანცელარიის უფროსი კახა ბენდუქიძე, კონტროლის პალატის თავმჯდომარე ლევან ბეჟაშვილი, იუსტიციის მინისტრის პირველი მოადგილე თინა ბურჯალიანი, დეპუტატები - მურთაზ ზოდელავა, პავლე კუბლაშვილი და შს მინისტრის მოადგილე ეკა ზღულაძე.

ზვავსაშიშროების გამო, მცხეთა-სტეფანწმინდა-ლარსის საავტომობილო გზის გუდაური-კობის მონაკვეთებზე ყველა სახის ავტოტრანსპორტის მოძრაობა აიკრძალა. ამავე გზის ჟინვალი-გუდაურის მონაკვეთზე აკრძალულია მისაბმელიანი, ნახევრადმისაბმელიანი ავტოტრანსპორტის და 30 ადგილზე მეტი ტევადობის ავტობუსების მოძრაობა, ხოლო დანარჩენი სახის ავტოტრანსპორტის მოძრაობა მხოლოდ მოცურების საწინააღმდეგო ჯაჭვების გამოყენებით არის დასაშვები. ასევე - ყველა სახის ავტოტრანსპორტის მოძრაობა აიკრძალა ჟინვალი-ბარისახო-შატილის საავტომობილო გზის ნაწილზე. იმერეთისა და წალკის მაღალმთიან სოფლებამდე მისასვლელ გზებზე ტრანსპორტის მოძრაობა სრულად აღდგა; გზები სისტემატურად იწმინდება. 

ეკონომიკური განვითარების მინისტრს, შვიდის ნაცვლად, ხუთი მოადგილე ეყოლება; ინიციატივა ლაშა ჟვანიამ მთავრობის სხდომაზე გაახმიანა - "ეფექტური მუშაობისთვის ხუთი მოადგილე სრულიად საკმარისია, დანარჩენები კი, ზედმეტები არიან. მიმაჩნია, რომ ჩვენი საქმიანობა ხუთი მოადგილის პირობებში უფრო ეფექტური იქნება". აღნიშნული ინიციატივის თანახმად, ეკონომიკური განვითარების სამინისტროში ხელშეკრულების მონიტორინგისა და ექსპორტის ხელშემწყობი დეპარტამენტები შეიქმნება. "მონიტორინგის დეპარტამენტი ინვესტორებსა და საქართველოს მთავრობას შორის გაფორმებული ხელშეკრულებებით გათვალისწინებული პირობების მონიტორინგს იკისრებს", - განაცხადა მინისტრმა. 

აზერბაიჯანის ენერგეტიკისა და მრეწველობის მინისტრმა განაცხადა, რომ აზერბაიჯანმა თურქეთისა და საბერძნეთისგან მისი ბუნებრივი აირის შეძენის წინადადება მიიღო. აზერბაიჯანული მხარე თურქეთის მხარესთან შეთანხმების გაფორმებაზე მუშაობს, რაც აზერბაიჯანული გაზის ტრანზიტის საკითხს ეხება. გაზის საბადო, "შაჰდენიზის" დამუშავების პირველი ფაზის ფარგლებში, ბუნებრივ აირს საქართველოსა და თურქეთს აწვდის. საბადოს, დამუშავების მეორე ფაზის რეალიზაციის შემდეგ, წელიწადში 14 მლრდ კუბური მეტრი გაზი დაემატება. ამ მოცულობიდან 3 მლრდ კუბური მეტრი მიმართული იქნება შიდა მოხმარებაზე, ხოლო დანარჩენი 11 მლრდ კუბური მეტრი - ექსპორტზე.

ქარტიის გაფორმების შემდეგ, მსოფლიოში აფხაზეთისა და ე. წ. სამხრეთ ოსეთის არაღიარების პოლიტიკა დაიწყება, ამის შესახებ ქართველ ჟურნალისტებს რეინტეგრაციის საკითხებში საქართველოს სახელმწიფო მინისტრმა ვაშინგტონში განუცხადა - "მთავარია, რომ დოკუმენტის მიღების შემდეგ, აუცილებლად დაიწყება არაღიარების პოლიტიკა, მიუხედავად იმისა, თუ რას ეუბნება რუსეთი სეპარატისტულად განწყობილ აფხაზებსა და ოსებს. მათ დამოუკიდებლობას არც ერთი სერიოზული სახელმწიფო არ აღიარებს". მისი თქმით, მას შემდეგ, რაც საქართველო აშშ-ს სტრატეგიული მეკავშირე გახდება, დაიწყება სახელმწიფოს გაძლიერება სამხედრო და ეკონომიკური თვალსაზრისით; შეიქმნება პირობები, რომ საქართველომ კონფლიქტები მშვიდობიანად მოაგვაროს.

აშშ-ის სახელმწიფო მდივნის მოადგილის თანაშემწე მეთიუ ბრაიზას განცხადებით, "დოკუმენტი არ შეიცავს უსაფრთხოების პირდაპირ გარანტიებს. თუმცა, ეს არის ძალიან მნიშვნელოვანი დოკუმენტი, რომელიც მასში აღნიშნულ ყველა სფეროში თანამშრომლობას ითვალისწინებს. რაც შეეხება უსაფრთხოების გარანტიებს, ამას საქართველო ნატო-ში გაწევრიანების შემთხვევაში მიიღებს".

საქართველოს საგარეო საქმეთა მინისტრ გრიგოლ ვაშაძის განცხადებით კი, ქარტიაში აღნიშნულია, რომ აშშ საქართველოს არმიის მოდერნიზაციის, თავდაცვისუნარიანობის გაზრდის ვალდებულებას იღებს - "რაც მთავარია, დოკუმენტის შესავალში ნათქვამია, რომ ორივე მხარე ადასტურებს საქართველოს ტერიტორიულ მთლიანობას, დამოუკიდებლობას და სუვერენიტეტს".

საქართველო სომხეთში რუსული გაზის ტრანზიტს აჩერებს; ამის შესახებ ინფორმაციას საქართველოს გაზისა და ნავთობის კორპორაცია ავრცელებს. სომხეთში რუსული გაზის მიწოდება საქართველოს ტერიტორიის გავლით ხორციელდება; გატარებული ბუნებრივი აირის 10%  კი, ტრანზიტის საფასურის სანაცვლოდ, საქართველოში რჩება. ქართულმა მხარემ ტრანზიტის საფასურის ან ტრანზიტის სანაცვლოდ მიღებული გაზის მოცულობის გაზრდის საკითხი არაერთხელ დააყენა, თუმცა, რუსეთი არსებული ტარიფების გადახედვაზე დღემდე უარს აცხადებს.

საქართველო რუსეთიდან გაზს არ იღებს, ბუნებრივი აირის მომწოდებელი ქვეყანაში აზერბაიჯანია", - განმარტა ენერგეტიკის მინისტრმა რუსეთის პრემიერ-მინისტრის განცხადების კომენტირებისას იმის თაობაზე, რომ "რუსეთი პოლიტიკურ საკითხებს ეკონომიკურში არ ურევს და საქართველოს გამართულად აწვდის გაზს". ალექსანდრე ხეთაგური აცხადებს, რომ "საქართველოს გაზმომარაგება მთლიანად ხორციელდება აზერბაიჯანის რესპუბლიკიდან და ასევე - სხვა კონტრაქტების მიხედვით, რომელთა შორისაა - ხუთწლიანი კონტრაქტი აზერბაიჯანის ნავთობის სახელმწიფო კომპანიასთან და "შაჰდენიზის"კონტრაქტი. რაც შეეხება ე. წ. სამხრეთ ოსეთის გაზმომარაგებას, მინისტრმა აღნიშნა, რომ ამას ტექნიკური მიზეზები უშლის ხელს. 

ეუთო-ს მუდმივმოქმედი საბჭოს 2009 წლის პირველივე სხდომაზე საქართველო ორგანიზაციის მისიისთვის მანდატის გაგრძელებისა და სხვა საერთაშორისო ფორმატების გამოყენების საკითხებს კიდევ ერთხელ დააყენებს. სხდომას ეუთო-ს ახალი თავმჯდომარე ქვეყნის, საბერძნეთის საგარეო საქმეთა მინისტრი დორა ბაკოიანისი უხელმძღვანელებს, რომელმაც ამ პოსტზე ფინელი კოლეგა ალექსანდრ სტუბი შეცვალა. საქართველოში მოქმედი ეუთო-ს სადამკვირვებლო მისიისთვის მანდატის გაგრძელების საკითხს, 2008 წლის ბოლოს, რუსეთმა ვეტო დაადო. ოფიციალურმა მოსკოვმა საკუთარი გადაწყვეტილება იმით დაასაბუთა, რომ ე. წ. სამხრეთ ოსეთი "დამოუკიდებელი სახელმწიფოა" და შესაბამისად, ეუთო-ს მისია არსებული ფორმატით იქ მოქმედებას ვეღარ გააგრძელებს. რუსეთის ამ გადაწყვეტილების შემდეგ, ოფიციალური თბილისი, აღნიშნული მანდატის გასაგრძელებლად და გასაფართოებლად, პარტნიორებთან და საერთაშორისო ორგანიზაციებთან კონსულტაციებს სისტემატურად მართავს.

უკრაინის ტერიტორიის გავლით ევროპაში რუსული გაზის ტრანსპორტირების პროცესზე დასაკვირვებლად, ევროკავშირის დამკვირვებელთა პირველი ჯგუფი კიევში მიემგზავრება, განაცხადა ენერგეტიკის საკითხებში ევროკომისარის ოფიციალურმა წარმომადგენელმა, ფერან ტარადელიას ესპუნიმ - "სპეციალისტები მზად არიან, გაზსადენზე, რომელიც უკრაინის ტერიტორიაზე გადის, მონიტორინგს უკვე დღეს შეუდგნენ". უკრაინამ მონიტორინგის ჯგუფში "გაზპრომის" ან რუსეთის ენერგეტიკის სამინისტროს წარმომადგენლის ჩართვაზე უარი განაცხადა; კიევმა კატეგორიული ფორმით განაცხადა, რომ მხოლოდ ევროკავშირის ქვეყნების წარმომადგენლებს დაუშვებს. ევროკავშირის თავმჯდომარე ჩეხეთში, უკრაინისა და რუსეთის მთავრობების წარმომადგენლებთან მაღალ დონეზე, გამუდმებული კონსულტაციები მიმდინარეობს, რაც შექმნილი სიტუაციიდან გამოსავლის ძიებას ისახავს მიზნად.

ამერიკის შეერთებულ შტატებსა და საქართველოს შორის გაფორმებული სტრატეგიული პარტნიორობის ხელშეკრულების პუნქტების შესრულებაზე საქართველოს მთავრობაში მუშაობა უკვე დაიწყო; უმთავრეს პრიორიტეტებს შორის თავისუფალი ვაჭრობა, სავიზო რეჟიმის გამარტივება, თავდაცვის სფეროში თანამშრომლობა და ორ ქვეყანას შორის კულტურული ურთიერთობების გაღრმავებაა. კონკრეტული გეგმების განხორციელება კი, უკვე ბარაკ ობამას მთავრობის ოფიციალური დამტკიცების შემდეგ დაიწყება.

საქართველომ და ამერიკის შეერთებულმა შტატებმა სამომავლო სამხედრო თანამშრომლობის გეგმა შეათანხმეს, განაცხადა შტატებში ოფიციალური ვიზიტით მყოფმა საქართველოს თავდაცვის მინისტრმა, რომელიც აშშ-ის თავდაცვის მდივნის მოადგილე გორდონ ენგლანდს შეხვდა; დახურულ კარს მიღმა საუბარი შეეხო სამხედრო თანამშრომლობის გაფართოებისა და საქართველოს ნატო-ში გაწევრიანების თემებს, ასევე - მხარეებმა განიხილეს სტრატეგიული თანამშრომლობის ქარტიით გათვალისწინებული საკითხები თავდაცვისა და უსაფრთხოების სფეროში თანამშრომლობის შესახებ.

საქართველოს გერმანიის თავდაცვის სამინისტროს საპარლამენტო შტატმდივანი თომას კოსენდაი ეწვია, რომელიც საქართველოს მთავრობისა და საერთაშორისო ორგანიზაციების წარმომადგენლებთან გამართავს შეხვედრებს. სამკაციანი დელეგაციის ვიზიტის მიზანს უსაფრთხოებისა და სამხედრო პოლიტიკის სფეროში არსებული ორმხრივი თანამშრომლობის გაღრმავება წარმოადგენს. საქართველოს ნატო-ში გაწევრიანებასთან დაკავშირებით მიღებული გადაწყვეტილება აუცილებლად შესრულდება, განაცხადა სტუმარმა თავდაცვის მინისტრ დავით სიხარულიძესთან შეხვედრისას - "გერმანია ამ მიმართულებით ყოველმხრივ დახმარებას გაუწევს საქართველოს, მათ შორის - შეიარაღებულ ძალებსა და თავდაცვის სამინისტროს. საქართველოს მხარს უჭერს არა მხოლოდ გერმანია, არამედ - ევროკავშირის ქვეყნები მთლიანად". მისი თქმით, გერმანია გააკეთებს ყველაფერს, რომ გაერო-ს მანდატი აფხაზეთში გაგრძელდეს. 

რუსული აგრესიის შედეგად უგზო-უკვლოდ დაკარგულ მეომართა ოჯახებს სახელმწიფო ერთჯერად ფულად დახმარებას გაუწევს; აღნიშნული ინიციატივა თავდაცვის მინისტრმა დღევანდელ მთავრობის სხდომაზე წარადგინა. უგზო-უკვლოდ დაკარგულად ითვლება 19 პიროვნება და შესაბამისად, 19 ოჯახს გაეწევა ერთჯერადი ფულადი დახმარება, 5 000 ლარის ოდენობით.

საქართველოს ოფიციალური ვიზიტით შვეიცარიის ფედერალური კანცლერი, საგარეო საქმეთა ფედერალური დეპარტამენტის ხელმძღვანელი მიშელინ კალმი-რეი ეწვია, რომელიც საგარეო საქმეთა მინისტრ გრიგოლ ვაშაძეს შეხვდება; იგეგმება მხარეებს შორის ნოტების გაცვლა, რომელიც რუსეთის ფედერაციაში შვეიცარიის კონფედერაციის მიერ საქართველოს ინტერესების დაცვაზე პასუხისმგებლობას ითვალისწინებს. თბილისში რუსეთის ფედერაციის ინტერესთა სექცია შეიქმნება, რომელიც საქართველოში რუსეთის ყოფილი საელჩოს შენობაში განთავსდება. სექციაში რუსეთის დიპლომატიური და ადმინისტრაციულ-ტექნიკური პერსონალი შევა, რომელთა აკრედიტება საქართველოში, შვეიცარიის საელჩოში მოხდება. საქართველოში მოსკოვის ინტერესებსაც სწორედ შვეიცარია დაიცავს. კანცლერი, ვითარების ადგილზე გაცნობის მიზნით, გორს მოინახულებს, ასევე - გაეცნობა ვარკეთილში დევნილებისთვის ბინათმშენებლობის პროექტს.

საქართველოს ენერგეტიკის მინისტრ ალექსანდრე ხეთაგურის განცხადებით, "ენგურჰესის" აქციათა 100 პროცენტი იყო, არის და დარჩება სახელმწიფოს საკუთრებაში; რუსულ კომპანია "ინტერრაოსთან"კი, გაფორმებულია ურთიერთგაგების მემორანდუმი, ჰესების კასკადის ერთობლივ მართვასთან დაკავშირებით. მინისტრის განმარტებით, აღნიშნულ მემორანდუმში გაწერილია ის ძირითადი პრინციპები, რომელთა საფუძველზეც გაფორმდება ერთობლივი მართვის ხელშეკრულება, რაც "გულისხმობს პარიტეტულ პრინციპზე ერთობლივი მართვის საბჭოს შექმნას". მისი თქმით, საქართველოს ენერგოსისტემა კომპანია "ინტერრაოსთან" საკმაოდ წარმატებულად თანამშრომლობს.

"საქართველოს მთავრობა მუშაობდა და მომავალშიც ჩვეულ რეჟიმში გააგრძელებს მუშაობას", - განაცხადა პრემიერ-მინისტრმა დღევანდელ მთავრობის სხდომაზე. გრიგოლ მგალობლიშვილის თქმით, მთავრობის მიზანი შექმნილი ვითარებიდან საქართველოს გამოყვანაა - "მინდა ხაზგასმით განვაცხადო, რომ მთავრობა მუშაობას ჩვეულ რეჟიმში გააგრძელებს. ჩვენი ამოცანაა, რთულ პერიოდში შევინარჩუნოთ სამუშაო ადგილები და გავაკეთოთ ყველაფერი, რათა ქართული ეკონომიკა დავიცვათ". მთავრობა პრემიერის ხელმძღვანელობით წელს პირველად შეიკრიბა; გრიგოლ მგალობლიშვილი საქართველოში 10 იანვარს გერმანიიდან დაბრუნდა, სადაც მას, ქართველი ექიმების რეკომენდაციით, სამედიცინო გამოკვლევა ჩაუტარდა.  

რუსეთის საოკუპაციო ჯარების მიერ მოსახლეობის მიმართ განხორციელებული ქმედებები ცეცხლის შეწყვეტის შესახებ ე. წ. სარკოზი-სააკაშვილი-მედვედევის 12 აგვისტოს შეთანხმებისა და ამ შეთანხმების ფარგლებში მოსკოვის მიერ აღებული ვალდებულებების მორიგი დარღვევაა, აცხადებს აფხაზეთის ლეგიტიმური მთავრობის ხელმძღვანელი მალხაზ აქიშბაია. მისი თქმით, რეგიონში შექმნილ ვითარებაზე უკვე სეპარატისტული დაჯგუფებების წარმომადგენლებიც ვერ ახდენენ ზემოქმედებას. რუსები მიზანმიმართულად აიძულებენ მშვიდობიან მოსახლეობას, დატოვონ საცხოვრებელი სახლები, რაც აფხაზების პროტესტს იწვევს.

"გაზპრომმა" უკრაინის გავლით ევროპაში რუსული გაზის ტრანზიტი დღეს განაახლა; შესაბამისი ბრძანება მოსკოვში, "გაზპრომის" ცენტრალური სადისპეტჩერო პუნქტიდან გაიცა - სადგურმა საცდელი გაშვება დაიწყო. რუსული მხარის განცხადებით, თუ უკრაინა რუსულ გაზს ტექნოლოგიური საჭიროებებისთვის გამოიყენებს, ევროპას ბუნებრივი აირის მიწოდება კვლავ შეუწყდება.

ნატო-რუსეთის საბჭოს გამართვის ფორმატზე საბოლოო გადაწყვეტილება დღეს, რუსეთ-ნატოს საბჭოს კომიტეტის მოსამზადებელ სხდომაზე იქნება მიღებული, განაცხადა ნატო-ში რუსეთის წარმომადგენელმა, დიმიტრი როგოზინმა - "კომიტეტი არაფორმალური სხდომის გამართვის ფორმატს დააზუსტებს; ორივე მხარის მონაწილეთა რაოდენობას, თარიღს და ადგილს განსაზღვრავს". შესაძლოა, არაფორმალური სამიტი ბრიუსელში, 26 იანვარს გაიმართოს.

"ქრისტიან-დემოკრატები" ოკუპირებული ტერიტორიების შესახებ კანონში ცვლილებების შეტანის მოთხოვნით გამოდიან; საპარლამენტო უმცირესობის ვიცე-სპიკერ ლევან ვეფხვაძის განცხადებით, ცვლილებების მიხედვით, სახელმწიფოს ოკუპირებულ ტერიტორიებზე ეკონომიკური პროექტების განხორციელების ყველანაირი ნებართვის გაცემის უფლება მოეხსნება - "კანონის მიღების მიუხედავად, სახელმწიფოს მაინც ჰქონდა უფლება, გაეცა გარკვეული სახის ნებართვები. სწორედ ეს არის ის ხვრელი, რომლის მეშვეობითაც ჩვენმა ხელისუფლებამ რუსეთთან "ენგურჰესის" 10-წლიანი ერთობლივი მართვის მემორანდუმი გააფორმა, ამიტომ მოვითხოვთ, ოკუპირებული ტერიტორიების შესახებ კანონში ისეთი ცვლილებები შევიდეს, რომლის მიხედვითაც, ხელისუფლებას ამ ნებართვების გაცემის უფლებაც მოეხსნება".

"ქრისტიან-დემოკრატები", საქართველოს პარლამენტის მიერ საკონსტიტუციო ცვლილებების განხორციელებისთანავე, რომელიც საკანონმდებლო ხელისუფლების უფლებამოსილების გაზრდას და პრეზიდენტის უფლებამოსილების შემცირებას გულისხმობს, მთავრობის ნდობის საკითხს დააყენებენ. ლევან ვეფხვაძემ განაცხადა, რომ "ენგურჰესთან" დაკავშირებით მთავრობის მიერ მიღებული გადაწყვეტილება არის სრულიად გაუმართლებელი - "ჩანს, ხელისუფლება ამ დოკუმენტზე ხელის მოწერას მაინც აპირებს და მთავრობამ უნდა იცოდეს, რომ ეს არის დანაშაულებრივი ქმედება და ამისთვის საზოგადოების წინაშე პასუხი უნდა აგოს". მისი თქმით, ეკონომიკის მინისტრის მიერ გაკეთებული განმარტება, რომ გაფორმებული მემორანდუმით რუსეთი აფხაზეთს საქართველოს შემადგენელ ნაწილად აღიარებს, სრულიად არაადეკვატური იყო.

გაზსადენის აღდგენითი სამუშაოების დასრულების შედეგად, რომელსაც საქართველოს გაზის ტრანსპორტირების კომპანიის თანამშრომლები ახორციელებდნენ, სომხეთისთვის ბუნებრივი აირის მიწოდება დღეს დილიდან განახლდა. "არმროსგაზპრომის" ინფორმაციით, გაზსადენზე მომხდარი ავარიის გამო, მომხმარებლის უზრუნველყოფა რეზერვების ხარჯზე ხდებოდა - "არანაირი შეზღუდვა არ გვქონდა; ჩვენ კიდევ უფრო რთული სიტუაციის გადალახვა და 10-15 დღის განმავლობაში რესპუბლიკის გაზით უზრუნველყოფა შეგვეძლო. ასე რომ, ამ დღეებშიც არანაირი პრობლემა არ იყო".

ანტიკრიზისული საბჭო საქართველოს საგარეო საქმეთა სამინისტროსა და საელჩოების მუშაობით ინტერესდება. აღნიშნული საბჭოს წევრები საგარეო პოლიტიკური უწყების ხელმძღვანელ გრიგოლ ვაშაძეს მოუსმენენ - აგვისტოს ომამდე და ომის დღეებში სამინისტროსა და საელჩოების საქმიანობის შესახებ ინფორმაციას მიიღებენ. "რუსეთმა ჩვენ საინფორმაციო ომი გამოგვიცხადა. გვაინტერესებს, რას აკეთებდა სამინისტრო და როგორ მოქმედებდნენ საელჩოები იმ დღეებში; რა რეაგირება მოახდინეს მათ და რამ გამოიწვია, რომ ჩვენ საინფორმაციო ომი წავაგეთ. ამ ომში ჩვენ საშინლად დავმარცხდით, სამწუხაროდ", - განაცხადა გია ცაგარეიშვილმა. მისი თქმით, გრიგოლ ვაშაძესთან საუბარი, შესაძლოა, სხვა საკითხებსაც შეეხოს.

საქართველოს ეროვნული საფეხბურთო ნაკრების მეკარე გიორგი მაკარიძემ საფრანგეთის უმაღლესი დივიზიონის გუნდ "ლე მანთან" 4-წლიანი კონტრაქტი გააფორმა; ქართველი ჭაბუკი, საწყის ეტაპზე, ახალგაზრდულ გუნდში იასპარეზებს. გიორგი მაკარიძემ საქართველოს ნაკრების მაისური, დღემდე, 5-გზის მოირგო.

საქართველოს ენერგეტიკის მინისტრ ალექსანდრე ხეთაგურს "უგარანტიობას" "არაპროგნოზირებადი დამატებითი გარანტიები" ურჩევნია; ამის შესახებ მან დარგობრივი ეკონომიკის კომიტეტის დღევანდელ სხდომაზე, "ენგურჰესის" საკითხის განხილვისას განაცხადა. საპარლამენტო ოპოზიციამ რუსეთის არაპროგნოზირებადობაზე გაამახვილა ყურადღება და მოსალოდნელ პროვოკაციებსა და გართულებებზე ისაუბრა. მინისტრის განცხადებით, მოლაპარაკებები გასაიდუმლოებული არ ყოფილა და ამაზე "მინიშნება" პარლამენტში, სექტემბერში გაკეთდა. მან დასძინა, რომ მემორანდუმი 28 დეკემბერს გაფორმდა და დასტური, რომ ეს ყველაფერი გასაიდუმლოებულად არ ხდება, პარლამენტში დღევანდელი გამოსვლა და საკითხზე მსჯელობაც არის. ენერგეტიკის მინისტრის მიწვევა ანტიკრიზისული საბჭოს სხდომაზეც  იგეგმებოდა, თუმცა, როგორც უმრავლესობის წევრმა, პავლე კუბლაშვილმა განაცხადა, სხდომაზე ეს საკითხი არ განხილულა. მისი თქმით, საკითხი დეტალურად განიხილეს დარგობრივი ეკონომიკის კომიტეტის სხდომაზე და ყველა კითხვასაც ამომწურავი პასუხი გაეცა. მინისტრის პასუხები და უმრავლესობის პოზიცია კი, საპარლამენტო ოპოზიციისთვის მიუღებელია, შესაბამისად, ალექსანდრე ხეთაგურს ოპოზიციის არგუმენტების მოსმენა უმცირესობის სხდომაზეც მოუწევს.

"ისტორიული დოკუმენტი მომავალი თაობებისთვის", ასე აფასებს საქართველო-აშშ-ს სტრატეგიული პარტნიორობის ქარტიას სახელმწიფო მინისტრი რეინტეგრაციის საკითხებში. თემურ იაკობაშვილის განცხადებით, მემორანდუმი განსაზღვრავს საქართველოს როლს და ადგილს მსოფლიო პოლიტიკაში. ქარტია ხელს შეუწყობს ქვეყნის პოლიტიკურ, ეკონომიკურ, დემოკრატიულ და კულტურულ განვითარებას - "ეს არის ინტერესთა თანხვედრის დოკუმენტი და საქართველო-ამერიკას შორის ურთიერთობის ლეგალიზების გარანტი".

ანტიკრიზისული საბჭოს დღევანდელ სხდომაზე საგარეო საქმეთა მინისტრი და საბჭოს წევრები ოთხ იდეაზე შეთანხმდნენ. გრიგოლ ვაშაძემ, სხდომის დასრულების შემდეგ, მხოლოდ ორ იდეაზე ისაუბრა, დანარჩენი ორის გახმაურებისგან კი, მინისტრმაც და საბჭოს წევრებმაც, თავი შეიკავეს. მინისტრი პარლამენტის მიერ "თეთრი წიგნის" მომზადების ინიციატივით გამოვიდა, რომელშიც ყველა ის დანაშაულებრივი ქმედება აღირიცხება, რაც რუსეთმა აფხაზეთსა და ცხინვალში ჩაიდინა. მისი თქმით, "თეთრი წიგნი" მიღებული ფორმაა - ფაქტობრივი მასალა დოკუმენტში იდება. დეპუტატმა პაატა დავითაიამ აღნიშნა, რომ მომავალში გაირკვევა, თუ როგორ აისახება ამ დოკუმენტში მისი წიგნი სეპარატიზმის ისტორიის შესახებ. რაც შეეხება მეორე ინიციატივას, პარლამენტის სამდივნოსა და საგარეო საქმეთა სამინისტროში პატარა ჯგუფის შექმნას გულისხმობს, რომელიც ინტერნეტის მეშვეობით საქართველოს საწინააღმდეგო გამოხტომებზე დროულ რეაგირებას მოახდენს.

პავლე კუბლაშვილი დადებითად აფასებს დღევანდელ შეხვედრას და აცხადებს, რომ საზოგადოება ინფორმირებული უნდა იყოს საგარეო უწყების საქმიანობის შესახებ. რაც შეეხება საინფორმაციო ომს, მან განაცხადა, რომ სიმართლე არ შეიძლება წაგებული იყოს. საგარეო საქმეთა მინისტრი კი მიიჩნევს, რომ საინფორმაციო ომს საქართველო არ აგებს, ვინაიდან რუსეთის მიერ დაკვეთილ ყველა სტატიაზე ქართული მხარე რეაგირებას ახდენს და ცრუ ინფორმაციებს აპროტესტებს. მისი თქმით, საქართველოსგან განსხვავებით, რუსეთი პროპაგანდისტულ ომს აწარმოებს, მაგრამ საქართველოს თავისი სიმართლე საერთაშორისო თანამეგობრობამდე მაინც მიაქვს, შეზღუდული რესურსების მიუხედავად.

14 იანვარს, ტრადიციულად, ქართული თეატრის დღე აღინიშნება. 1850 წლის ამ დღეს პროფესიული ქართული თეატრის ფუძემდებლის, გიორგი ერისთავის პიესის პრემიერა შედგა. ამ თარიღის აღსანიშნავად გორში გამართულ ღონისძიებებს კულტურის მინისტრი ნიკა რურუა, თეატრის მოღვაწეთა კავშირის თავმჯდომარე გიგა ლორთქიფანიძე, თბილისისა და რეგიონების თეატრების წარმომადგენლები, ცნობილი რეჟისორები და მსახიობები დაესწრებიან. სტუმრები, ქალაქის ღირსშესანიშნაობებთან ერთად, რუსული აგრესიის შედეგად დაზიანებულ და შემდგომ აღდგენილ გორის უბნებს დაათვალიერებენ. გორის დრამატული თეატრის დასი წარმოადგენს ლევან მალაზონიას პიესას - "დევნილნი", რომლის რეჟისორია იოსებ ნემსაძე. სპექტაკლის დასრულების შემდეგ, თეატრის მოღვაწეთა კავშირი გორელ მსახიობებს დააჯილდოებს. აღნიშნული ღონისძიებები ადგილობრივი ხელისუფლების ინიციატივითა და მხარდაჭერით იმართება.

სერგეი შამბა "ენგურჰესის" საქმის დეტალების გაცნობას მოითხოვს და კიდევ ერთხელ აცხადებს, რომ რუსულ და ქართულ მხარეებს შორის შესაბამისი ხელშეკრულება აფხაზურ მხარესთან შეთანხმებით უნდა გაფორმდეს - "ენგურჰესი" აფხაზეთის ტერიტორიაზე მდებარეობს და ყველაფერი ჩვენთან შეთანხმებით უნდა გადაწყდეს".

პარტია "საქართველოს გზის" ლიდერმა, სალომე ზურაბიშვილმა, "ენგურჰესის" საკითხთან დაკავშირებით საპროტესტო განცხადება ხელმოსაწერად ყველა პოლიტიკურ პარტიას და დიპლომატიურ კორპუსს გადაუგზავნა.

აფხაზი სეპარატისტების და რუსი ოკუპანტების მიერ კონტროლირებადი ტერიტორიიდან, ენგურის ხიდთან მდებარე ქართული პოლიციის საგუშაგოს ცეცხლი გაუხსნეს - ქართველი პოლიციელების მიმართულებით ჭუბურხინჯის მხრიდან გაიხსნა ცეცხლი, სადაც რუსი ოკუპანტები არიან განთავსებულნი. ერთ-ერთი თვითმხილველის ცნობით, თავდამსხმელები ენგურის ხიდის შუა ნაწილამდე იყვნენ გადმოსულები და ქართული საგუშაგოს მიმართულებით მიზანმიმართულად, ყუმბარმტყორცნებიდან და ცეცხლსასროლი იარაღიდან ისროდნენ. ქართულმა პოლიციამ თავდაცვითი პოზიციები დაიკავა, თუმცა, საპასუხო ცეცხლი არ გაუხსნია. ქართულმა მხარემ ევროკავშირისა და გაერო-ს მისიას მომხდარის შესახებ ინფორმაცია მიაწოდა; ინციდენტის ადგილზე მონიტორებს ელოდებიან.

აჭარაში რძის პროდუქტების გადამამუშავებელი საწარმო გაიხსნება; სადაც მიმდინარე სარემონტო სამუშაოები ლევან ვარშალომიძემ მოინახულა. "რძისა და ქართული პროდუქტების" კომპანიაში 60 ადამიანია დასაქმებული, მათი რიცხვი, სამომავლოდ, 120-მდე გაიზრდება. "სოფლის მეურნეობის განვითარება რეგიონის პრიორიტეტია. ყველა ბიზნესმენს და მეწარმეს ვთხოვ, თუ აქვთ მსგავსი იდეები, მოგვმართონ, როგორც - მთავრობას, ასევე - სოფლის მეურნეობის სამინისტროს. წელსაც იქნება იაფი სესხის პროგრამა, დახმარება და მხარდაჭერა, ოღონდ გავხსნათ საწარმოები და დავასაქმოთ ჩვენი ხალხი", განაცხადა აჭარის მთავრობის თავმჯდომარემ.

საქართველოს პრეზიდენტი, ქვეყნის პრემიერ-მინისტრთან ერთად, საავტომობილო გზების დეპარტამენტის ხელმძღვანელებს შეხვდა. მიხეილ სააკაშვილის თქმით, "აზერბაიჯანის საზღვრის შეერთება თბილისთან თანამედროვე ტიპის ავტობანის მეშვეობით, ხოლო შემდეგ, თბილისის შეერთება შავ ზღვასთან და თურქეთის მთავარ ავტობანთან, საშვილიშვილო ინფრასტრუქტურული პროექტია. პარალელურად, ჩვენ გავიყვანთ თანამედროვე ჩქაროსნულ რკინიგზას თბილისიდან ბათუმში, ხოლო შემდეგ - თბილისიდან სოხუმში. ეს ის პროექტებია, რომლებიც საქართველოს ეკონომიკას და ჩვენი ცხოვრების დონეს განვითარების ახალ ეტაპზე გადაიყვანს და შეკრავს ქვეყანას ინფრასტრუქტურული თვალსაზრისით". პრეზიდენტმა საქართველოს მასშტაბით, სოფლების გზების მშენებლობის შესახებაც მოისმინა ინფორმაცია. "ჩვენ შევინარჩუნებთ სიმყარეს; სირთულეები არსებობს და გვაქვს დრო, რომ უფრო კარგად მოვემზადოთ ეკონომიკური აქტიურობის აღდგენისთვის. მაქსიმალურად ჩქარა უნდა დავიწყოთ მუშაობა. ინფრასტრუქტურაში ჩადებული ფული თითოეული ოჯახის, თითოეული ფირმის მომავალში ჩადებული ფულია. ინფრასტრუქტურულმა პროექტებმა ეკონომიკა დეპრესიისგან უნდა დაიცვას", განაცხადა მიხეილ სააკაშვილმა. 

საბერძნეთის ინიციატივით, რომელიც ეუთო-ს თავმჯდომარე ქვეყანაა, ვენაში განახლდა კონსულტაციები საქართველოში ორგანიზაციის საველე დასწრების საკითხის თაობაზე. რუსეთის წარმომადგენელმა, ანვარ აზიმოვმა, განაცხადა, რომ საბერძნეთი მზადაა, მხარეებს კომპრომისული ვარიანტი შესთავაზოს. შეთავაზებები ქართული მხარისთვის ცნობილია, მაგრამ კონკრეტული განცხადებები არ კეთდება. რუსეთის პოზიცია არ იცვლება; მოსკოვი ითხოვს ორი დამოუკიდებელი მისიის დაფუძნებას - თბილისსა და ცხინვალში. "ცხინვალში საველე დასწრების საკითხი ეუთო-მ სამხრეთ ოსეთის რესპუბლიკის ხელმძღვანელობას უნდა შეუთანხმოს", აცხადებს ანვარ აზიმოვი.

ეუთო-ს მუდმივმოქმედი საბჭოს სხდომაზე, რომელიც გუშინ ვენაში გაიმართა, ორგანიზაციის თავმჯდომარე ქვეყნის - საბერძნეთის - საგარეო საქმეთა მინისტრმა საქართველოში არსებულ ვითარებაზე და ეუთო-ს მანდატის გაგრძელების საკითხზე განსაკუთრებული ყურადღება გაამახვილა. "ეუთო ვალდებულია უზრუნველყოს ორგანიზაციის მისიის ყოფნა საქართველოში, - მისი ეს განცხადება ეუთო-ს ვებგვერდზეა გამოქვეყნებული, - სასწრაფოდ უნდა იქნას მიღწეული კონსენსუსი თავად ორგანიზაციის წევრებს შორის". დორა ბაკოიანმა 2009 წლის გეგმა საკმაოდ ვრცლად მიმოიხილა. ეუთო-ში საქართველოს ელჩმა, ვიქტორ დოლიძემ, წუხილი გამოთქვა, რომ საქართველოში ორგანიზაციის მანდატის გაგრძელების საკითხზე კონსენსუსის მიღწევა ვერ მოხერხდა. მან მხარეებს მჭიდრო და კონსტრუქციული თანამშრომლობისკენ მოუწოდა. რუსეთის პოზიცია, რომ მისიები ცხინვალსა და თბილისში უნდა არსებობდეს და რომელმაც ვეტო დაადო საქართველოში ეუთო-ს მანდატის გაგრძელების საკითხს, არ შეცვლილა. ეს საქართველოს ტერიტორიული მთლიანობისა და სუვერენიტეტის პრინციპს ეწინააღმდეგება. რუსეთის გარდა, აღნიშნული პრინციპი ყველა დელეგაციამ აღიარა - ოფიციალური მოსკოვის გადაწყვეტილებას არცერთმა სხვა ქვეყანამ მხარი არ დაუჭირა. საქართველოში ეუთო-ს მისიას მანდატი 18 თებერვალს ეწურება.

სოხუმის სეპარატისტული ხელისუფლება აფხაზეთში გაერო-ს მისიის მოქმედების გაგრძელების მომხრეა, მაგრამ სხვა სახელწოდებით. დე ფაქტო საგარეო საქმეთა მინისტრ სერგეი შამბას განცხადებით, "მისიის მოქმედი მანდატი და სახელწოდება, რესპუბლიკაში მომხდარი ცვლილებების გათვალისწინებით, უნდა გადაიხედოს; არ შეიძლება, ის ისევ "საქართველოში გაერო-ს მისიად" იწოდებოდეს, რადგან ვთვლით, რომ მას "გაერო-ს მისია აფხაზეთში" უნდა ერქვას, თუმცა ვაცნობიერებთ, რომ ამ ეტაპზე, საქართველოსა და მისი მხარდამჭერი ქვეყნების პოზიციის გათვალისწინებით, ეს შეუძლებელია. აფხაზურმა მხარემ საკუთარი წინადადება უკვე წარმოადგინა. 18 თებერვალს გაერო-ს უშიშროების საბჭო საბოლოო გადაწყვეტილებას მიიღებს".

"გაზის კრიზისი ევროპისთვის სერიოზული გაკვეთილი უნდა გახდეს, - განაცხადა ამერიკის შეერთებული შტატების სახელმწიფო მდივანმა, - უნდა გავითავისოთ, რომ ენერგოდამოუკიდებლობა საკვანძო საკითხია". კონდოლიზა რაისის პროგნოზით, სანამ უკრაინა რუსეთის ნავთობსა და გაზზე იქნება დამოკიდებული, მსგავსი სიტუაციები კიდევ განმეორდება. "რუსეთის მიერ ენერგორესურსების პოლიტიკურ ბერკეტად გამოყენების ტენდენცია არ შესუსტებულა, პირიქით, გაძლიერდა", აღნიშნა მან.  

საქართველოს სოფლის მეურნეობის მინისტრმა მთავრობის სხდომაზე ანტიკრიზისული გეგმა წარადგინა, რომელიც სოფლის მეურნეობის დარგში ინფრასტრუქტურის განახლებას და ახალი სამუშაო ადგილების შექმნას ითვალისწინებს. როგორც ბაკურ კვეზერელმა აღნიშნა, გეგმაში გათვალისწინებულია უკვე არსებული სამუშაო ადგილების შენარჩუნებაც, რისთვისაც დასახულია კონკრეტული ღონისძიებები. რაც შეეხება სოფლების ტრაქტორებით უზრუნველყოფის პროგრამას, მინისტრის ინფორმაციით, 2008 წელს მთელ საქართველოს მოიცავს, ხოლო შესაბამისი სერვისცენტრების აღჭურვა კვლავ გაგრძელდება. საქართველოს პრემიერ-მინისტრის განცხადებით, "ანტიკრიზისული გეგმის მიზანი სოფლის მხარდაჭერა და რეგიონული განვითარებაა".

სახელმწიფო მინისტრი რეგიონული მართვის საკითხებში დავით ტყეშელაშვილი, კახეთის რეგიონის მაჟორიტარი დეპუტატები და საფინანსო-საბიუჯეტო საპარლამენტო კომიტეტის თავმჯდომარე ზურაბ მელიქიშვილი თელავში, რეგიონის პრობლემებთან დაკავშირებით, თათბირს მართავენ. შეხვედრაზე მიმდინარე ეკონომიკური პროექტები და 2009 წლის სახელმწიფო ბიუჯეტით გათვალისწინებული პრიორიტეტები განიხილება.

"ეროვნულ-დემოკრატიული პარტია", "ენგურჰესის" ხელშეკრულებასთან დაკავშირებით, მესამე პირის სახით, ევროკავშირის ჩართვას ითხოვს. პარლამენტარ გურამ ჩახვაძის განცხადებით, პარტიას მიაჩნია, რომ რუსული სახელმწიფო კომპანიისთვის სამართავად ჰესის გადაცემა რუსეთისთვის სტრატეგიული ობიექტის ხელში ჩაგდების იურიდიულ საფუძველს ქმნის. მისი თქმით, არსებობს საფუძვლიანი ეჭვი, რომ ამგვარი შეთანხმებით რუსეთი ცდილობს, ხავერდოვანი ფორმით მოახდინოს მიტაცებული ქონების ლეგალიზაცია. როგორც გურამ ჩახვაძემ აღნიშნა, "დამაფიქრებელია თავად მემორანდუმის მომზადებისა და თბილისში ხელმოწერის კონსპირაციულობა; დარღვეულია ხელისუფლების საქმიანობის გამჭვირვალობის პრინციპი, ქართული საზოგადოებისთვის დღემდე უცნობია მემორანდუმის სრული ტექსტი". "ედპ" საკანონმდებლო ინიციატივითაც გამოდის - სტრატეგიული დანიშნულების ობიექტების განკარგვა მოხდეს მხოლოდ პარლამენტის გადაწყვეტილებით, რითაც ეს პროცესი, სულ მცირე, ტრანსპარანტული გახდება.

"რუსეთის სამხედრო ძალებმა კასეტური ბომბები გორსა და ქარელში გამოიყენეს, რასაც სამოქალაქო პირების დაჭრა და დაღუპვა მოჰყვა. სამოქალაქო დანაკარგი გამოიწვია, ასევე, მათ მიერ დასახლებული რაიონების არაამორჩევითმა სარაკეტო დაბომბვებმა, - ნათქვამია ადამიანის უფლებათა დამცველი საერთაშორისო ორგანიზაცია "Human Rights Watch"-ის ყოველწლიურ ანგარიშში, - რუსი სამხედროები მათ მიერ კონტროლირებად საქართველოს ტერიტორიებზე სამოქალაქო მოსახლეობის უსაფრთხოებას არ უზრუნველყოფდნენ და საქართველოს ხელისუფლებას წესრიგის დაცვაში ხელს უშლიდნენ. შედეგად, ოსი შეიარაღებული პირები და დამნაშავეთა ბანდები ძარცვავდნენ და წვავდნენ სახლებს, ძალადობდნენ, სცემდნენ და ატერორებდნენ ადგილობრივ მოსახლეობას. რუსმა ჯარისკაცებმა და შეიარაღებულმა ოსებმა 14 ქართველი სამხედრო დაატყვევეს, რომლებიც სასტიკად აწამეს. სულ მცირე, ერთი ქართველი ჯარისკაცი კი, სასამართლოს გარეშე, სიკვდილით დასაჯეს".

რუსული ინტერვენციით გამოწვეულ ეკოციდთან დაკავშირებით განსხვავებული ციფრები არსებობს. როგორც გარემოსა და ბუნებრივი რესურსების დაცვის მინისტრმა განაცხადა, ქართველი მეცნიერები და ექსპერტები გაცილებით მაღალ ციფრებს აფიქსირებენ. მისი თქმით, საერთაშორისო ორგანიზაციებს საფუძვლიანი კვლევა არ ჩაუტარებიათ და შესაბამისად, არ აქვთ პრეტენზია, რომ მათი გათვლები ზუსტია. სამინისტრომ ევროკომისიის ელჩს აცნობა ქართველი მეცნიერების მიერ დათვლილი ზარალის ოდენობა. ქართული მხარე მზად არის, წარადგინოს მასალები, რომელზე დაყრდნობითაც საკითხი იქნა შესწავლილი. ევროკავშირის ელჩი საქართველოში პერ ეკლუნდი ეკოციდის შედეგებს ევროკომისიას წარუდგენს.

"საქართველოსთვის მნიშვნელოვანია ეუთო-ს მისიის შენარჩუნება, მაგრამ არა ყველაფრის ფასად", განაცხადა სახელმწიფო მინისტრმა რეინტეგრაციის საკითხებში თემურ იაკობაშვილმა. როგორც მან აღნიშნა, მისიის შენარჩუნება არ უნდა მოხდეს საქართველოს ტერიტორიული მთლიანობის ხარჯზე - "ქართული მხარე არ დათანხმდება ისეთ ფორმულირებას და ისეთ მანდატს, რომელიც ამ ძირითად პრინციპს დაარღვევს". 

"რუსეთი არის ოკუპანტი და ცდილობს, საერთაშორისო ორგანიზაციებმა რაც შეიძლება ნაკლები როლი ითამაშონ ჩვენს ქვეყანაში. რუსეთისგან არაფერ პოზიტიურს არ ველოდებით, - აცხადებს სახელმწიფო მინისტრი ევროპასთან ინტეგრაციის საკითხებში გიორგი ბარამიძე, - თუ რუსეთი შესძლებს ეუთო-ს დაბლოკვას, მას არანაირი საშუალება არ გააჩნია, დაბლოკოს ევროკავშირის მისია".

ჭიაურის ტყის სარეაბილიტაციო სამუშაოებში 100-მდე ადგილობრივი მოსახლე დასაქმდება. გარემოს და ბუნებრივი რესურსების დაცვის მინისტრი კახეთის რეგიონს ეწვევა და ლაგოდეხის რაიონში, გუბერნატორ გიორგი ღვინიაშვილთან და ბუნების დაცვის მსოფლიო ფონდის წარმომადგენლებთან ერთად, ადგილობრივ მოსახლეობას შეხვდება. მინისტრი ჭიაურის ტყეში მიმდინარე სარეაბილიტაციო სამუშაოებს გერმანელ ექსპერტებთან ერთად შეამოწმებს. ლაგოდეხში, გარემოს დაცვის კომიტეტის წევრებთან ერთად, პარლამენტარები ჩავლენ. ბუნების დაცვის მსოფლიო ფონდის მხარდაჭერით, მიმდინარე ერთწლიანი პროგრამის ფარგლებში, ჭიაურის ტყის მასივის აღდგენითი სამუშაოები გაზაფხულიდან ინტენსიურად დაიწყება.

ევროკავშირის თავმჯდომარე ქვეყანა - ჩეხეთი - საქართველოში საერთაშორისო მისიების მუშაობის გაგრძელების საკითხს მხარს უჭერს; ელჩმა მიროსლავ კოსტელკამ მოსკოვში გამართულ პრესკონფერენციაზე კიდევ ერთხელ გამოხატა მხარდაჭერა საქართველოს მიმართ და განაცხადა, რომ მისი ქვეყანა ჟენევის მოლაპარაკებების განახლების მომხრეა - "თქვენ იცით, რომ ჩვენ მხარს ვუჭერთ ჟენევის მოლაპარაკებებს, ასევე - საქართველოში ევროკავშირისა და ეუთო-ს მისიების გაგრძელების საკითხს".

საქართველოში ჩეხეთის ელჩის განცხადებით კი, "ევროკავშირის დამკვირვებლების რაოდენობა, ამ ეტაპზე, საკმარისია. უნდა შეიცვალოს თუ არა მათი ფორმატი და გაიზარდოს რაოდენობა, ამას მომავალში განვითარებული მოვლენები განსაზღვრავს. მისიისთვის დამატებითი უფლებამოსილების მინიჭების საკითხზე საუბარი მხოლოდ მას შემდეგ შეიძლება დაიწყოს, რაც დამკვირვებლები კონფლიქტის ზონაში შესვლას მოახერხებენ".

"რუსეთის ფედერაცია არ აპირებდა აფხაზეთისა და სამხრეთ ოსეთის დამოუკიდებლობის აღიარებას; კონფლიქტის შემდეგაც კი, ბოლომდე მზად იყო, მათი სტატუსის შესახებ მოლაპარაკებები ეწარმოებინა. რუსეთმა მათი დამოუკიდებლობის აღიარების გადაწყვეტილება საქართველოდან მომავალი სიგნალების შემდეგ მიიღო, რომელთა მიხედვითაც, თბილისი საბრძოლო მოქმედებების გაგრძელებას აპირებდა", ეს განცხადება რუსეთის საგარეო საქმეთა მინისტრმა მოსკოვში გამართულ პრესკონფერენციაზე გააკეთა. სერგეი ლავროვი აცხადებს, რომ რუსეთის ფედერაცია ყველანაირად შეუშლის ხელს დამოუკიდებელ სახელმწიფოთა თანამეგობრობის დაშლისკენ მიმართულ ნებისმიერ მცდელობას.

თბილისის მერმა სამკერვალო სალონი "უნისტილი" დაათვალიერა, სადაც იკერება უნიფორმები სახელმწიფო უწყებებისთვის. საწარმოში ოთხმოცამდე ადამიანია დასაქმებული, წარმოებული პროდუქცია კი, ექსპორტზე ჰოლანდიაში გადის. გიგი უგულავას განცხადებით, "ეკონომიკური კრიზისის პირობებში მნიშვნელოვანია მცირე და საშუალო ბიზნესის განვითარება, ასევე - მეტი სამუშაო ადგილების შექმნა, რასაც, თავის მხრივ, დედაქალაქის მერიაც უწყობს ხელს".

ოსი სეპარატისტებისა და რუსი ოკუპანტების მიერ კონტროლირებადი ტერიტორიიდან განხორციელებული სროლის შესახებ, რომლის შედეგად შიდა ქართლის სამხარეო პოლიციის თანამშრომელი, 1982 წელს დაბადებული მამუკა კახნიაშვილი დაიღუპა, შინაგან საქმეთა სამინისტრო, ამ ეტაპზე, დეტალურ ინფორმაციას არ ფლობს. ინციდენტი ქარელის რაიონის სოფელ კნოლევის პოლიციის განყოფილების მიმდებარე ტერიტორიაზე მოხდა. წინასწარი ინფორმაციით, სროლა მაყუჩიანი სნაიპერული შაშხანიდან განხორციელდა. ეს უკვე, ბოლო ორი თვის განმავლობაში, ოკუპირებული ტერიტორიებიდან ქართველი სამართალდამცავის მკვლელობის მეთერთმეტე შემთხვევაა.

მომხდართან დაკავშირებით, საქართველოს საგარეო საქმეთა სამინისტრო აცხადებს, რომ "კვლავ გრძელდება რუსი ოკუპანტებისა და მათ მიერ კონტროლირებადი მარიონეტული რეჟიმების აღვირახსნილი და მიზანმიმართული პროვოკაციული ქმედებები, რის შედეგადაც, სულ უფრო იზრდება მსხვერპლთა რიცხვი". საქართველოს პრემიერ-მინისტრმა ინციდენტი "რუსული აგრესიის მორიგ მსხვერპლად" შეაფასა და ქართველი პოლიციელის ოჯახს მიუსამძიმრა.

ცხინვალის დე ფაქტო თავდაცვის სამინისტრო კი, ქართველი პოლიციელის მკვლელობასთან ოსური მხარის კავშირს უარყოფს და გავრცელებულ ინფორმაციას პროვოკაციას უწოდებს - "უახლოესი ოსური პოსტები სოფელ კნოლევიდან 4-5 კილომეტრშია განთავსებული და ასეთ მანძილზე სნაიპერული გასროლაც კი შეუძლებელია". ე. წ. სამხრეთ ოსეთის სამხედრო კომენდანტმა, ანატოლი ტარასოვმა, ქართველი პოლიციელის მკვლელობის ფაქტი დაადასტურა; მან ინფორმაცია საქართველოს შსს-დან და ევროკავშირის დამკვირვებლებისგან მიიღო.

ევროკავშირის სადამკვირვებლო მისიის განცხადებაში ხაზგასმით არის აღნიშნული, რომ მომხდარი წარმოადგენს ცეცხლის შეწყვეტის შესახებ 6-პუნქტიანი შეთანხმების მიუღებელ დარღვევას. მისია იმედს გამოთქვამს, ფაქტი სრულად იქნება გამოძიებული და დამნაშავეები შესაბამისად დაისჯებიან.

საგარეო საქმეთა სამინისტროში საგარეო ურთიერთობებისა და ევროპული სამეზობლო პოლიტიკის საკითხებში ევროკავშირის უმაღლეს კომისარს, ბენიტა ფერერო-ვალდნერს უმასპინძლეს. "ვიზიტი წარმოადგენს საქართველოსადმი ევროკავშირის პოლიტიკური მხარდაჭერის დემონსტრირებას, განსაკუთრებით - საქართველოს წინააღმდეგ განხორციელებული რუსული სამხედრო აგრესიის შემდეგ" ნათქვამია საგარეო უწყების განცხადებაში. ვიზიტის ფარგლებში, ევროკომისიასა და საქართველოს მთავრობას შორის, 2008-2010 წლებში ევროკავშირის გაზრდილი ფინანსური დახმარების შესახებ, ერთობლივ განცხადებას მოეწერება ხელი. "ევროკავშირი არ აპირებს საქართველოში დამკვირვებლების რიცხვის გაზრდას და მანდატის გაფართოებას. ახლა მთავარია მშვიდობის განმტკიცება კონფლიქტის რეგიონებში, მხარეებს შორის ნდობის აღდგენის ხელშეწყობა და ჟენევის მოლაპარაკებების განვითარება", განაცხადა ბენიტა ფერერო ვალდნერმა.  

გალის რაიონის სოფელ საბერიოში რუსმა ოკუპანტებმა ადგილობრივ მკვიდრს ესროლეს; ინციდენტი იმ დროს მოხდა, როდესაც მანუჩარ ქობალია ზუგდიდში აპირებდა გადასვლას. მას ორი ტყვია მოხვდა. დაჭრილი ზუგდიდის რესპუბლიკურ საავადმყოფოში გადაიყვანეს. ექიმების განცხადებით, მანუჩარ ქობალიას ჯანმრთელობის მდგომარეობა დამაკმაყოფილებელია.

ევროსაბჭოს საპარლამენტო ასამბლეა მოსკოვს რეზოლუციის შეუსრულებლობაში ადანაშაულებს; ასამბლეის ხელმძღვანელი ლუის მარია დე პუჩი მიიჩნევს, რომ რუსეთს არ შეუსრულებია ე. წ. სამხრეთ ოსეთთან დაკავშირებული რეზოლუციის ყველა დებულება; განცხადებაში ხაზგასმულია, რომ რუსეთი მზად არის, ქართულ მხარესთან ასამბლეის ფარგლებში დიალოგი დაიწყოს. ორგანიზაცია აღნიშნული რეზოლუციით რუსეთს მოუწოდებს, გააუქმოს აფხაზეთისა და ე. წ. სამხრეთ ოსეთის დამოუკიდებლობის აღიარების გადაწყვეტილება.

ქართულმა მხარემ, ეროვნული უმცირესობების საკითხებში ეუთო-ს უმაღლეს კომისარ კნუტ ვოლებეკთან შეხვედრაზე, საქართველოს ოკუპირებულ ტერიტორიებზე ადამიანის უფლებების დარღვევის საკითხი დააყენა, რამაც, რეინტეგრაციის საკითხებში სახელმწიფო მინისტრ თემურ იაკობაშვილის განცხადებით, "რუტინული ხასიათი მიიღო". კნუტ ვოლებეკი, აღნიშნულ საკითხებთან დაკავშირებით, აფხაზეთში გაემგზავრება და მდგომარეობის ადგილზე გაცნობას შეეცდება, თბილისში დაბრუნების შემდეგ კი, საქართველოს აღმასრულებელ და საკანონმდებლო ხელისუფლების წარმომადგენლებთან გააგრძელებს შეხვედრებს.

საბერძნეთის პარლამენტის ვიცე-სპიკერის, გეორგიოს სურლასის, განცხადებით, ეუთო-ს თავმჯდომარე ქვეყანა, საბერძნეთი, მაქსიმალურად შეეცდება საქართველო-რუსეთის კონფლიქტის მშვიდობიანი გზით მოგვარებას. ბერძენი სტუმარი პარლამენტის ვიცე-სპიკერ მიხეილ მაჭავარიანს და უმრავლესობი წევრებს შეხვდა. მისი თქმით, საბერძნეთის პარლამენტის საქართველოსთან მეგობრობის ჯგუფი, უახლოეს მომავალში, არგონავტების მოგზაურობისადმი მიძღვნილი სპეციალური კონფერენციის ჩატარებას გეგმავს; უძველეს ისტორიულ ურთიერთობებზე საუბარი ორი ქვეყნის სამომავლო ურთიერთობების დასახვას შეუწყობს ხელს.

საქართველოში ოფიციალური ვიზიტით მყოფი ევროკომისარი საგარეო ურთიერთობათა და ევროპული სამეზობლო პოლიტიკის საკითხებში ბენიტა ფერერო-ვალდნერი დევნილების კომპაქტურად ჩასახლების ცენტრს ესტუმრა, სადაც ევროკომისიისა და გაერო-ს ლტოლვილთა უმაღლესი კომისარიატის ერთობლივი პროექტი - გამოზამთრების პროგრამა მიმდინარეობს. აღნიშნულ ცენტრში 200-მდე დევნილი ცხოვრობს, პროგრამა კი - დანიის ლტოლვილთა საბჭომ განახორციელა. ევროკომისარმა დადებითად შეაფასა ჩატარებული სამუშაოები და აღნიშნა საერთაშორისო ორგანიზაციებთან თანამშრომლობის მნიშვნელობა პრობლემების მოგვარების მიზნით. გაერო-ს ლტოლვილთა უმაღლესმა კომისარიატმა ევროკომისიისგან მიიღო დაფინანსება და გააგრძელებს ზრუნვას საქართველოში ყველა იძულებით გადაადგილებული პირის პრობლემების მოსაგვარებლად.

ოპოზიციონერი დეპუტატი პაატა დავითაია "ენგურჰესთან" დაკავშირებით საქართველოს ხელისუფლების გეგმებს ქვეყნის უსაფრთხოებისთვის ღალატად აფასებს და აფხაზურ-რუსულ შეთქმულებაზე საუბრობს; მან პრესკონფერენციაზე შეთქმულების სქემაც წარმოადგინა, რაც, დეპუტატის თქმით, რუსული "ინტერ რაოს" წარმომადგენლებისა და აფხაზი სეპარატისტების შეხვედრისას გაკეთებული განცხადებებითაც დადასტურდა - ითქვა, რომ რუსეთი ხელშეკრულებას სეპარატისტებთანაც გააფორმებს. რაც შეეხება სქემას, პაატა დავითაია თვლის, რომ შეთქმულების პირველი ნაწილი "ენგურჰესის" სოხუმში რეგისტრაციაა, შემდეგი კი - ხელშეკრულების სეპარატისტებთან დადება, რომლის თანახმადაც, გაფორმდება მათი წილობრივი მონაწილეობა და ელექტროენერგიის გარკვეულ წილს აფხაზები უფასოდ მიიღებენ; კერძოდ, საუბარია ერთი მილიარდი კილოვატის მიღებაზე წლიურად, რასაც აფხაზეთი ვერ მოიხმარს, რუსეთში გაყიდის და თანხასაც სეპარატისტები აიღებენ.

"აშშ-ის ახალი ადმინისტრაცია ყოფილ მტრებს ხელს უწვდის, თუ ისინი მზად არიან, შეკრული მუშტი გახსნან" - ამერიკის რიგით 44-ე პრეზიდენტის საინაუგურაციო სიტყვაში შემავალი ეს ფრაზა, რომელიც ოფიციალურად ისლამური სამყაროსადმი მიმართვის კონტექსტში იყო ნათქვამი, მოსკოვში რუსეთის ხელისუფლებისადმი მინიშნებად აღიქვეს. აშშ-ის ახალი პრეზიდენტი პენტაგონის ხელმძღვანელობასთან და სამხედროებთან ერაყიდან ჯარების გაყვანის დაჩქარების შესაძლებლობებს განიხილავს, რის შესახებაც დაპირება მან წინასაარჩევნო პროგრამაში გააკეთა. ბარაკ ობამას ბრძანებით, ჯორჯ ბუშის მიერ გაცემული შეუსრულებელი განკარგულებები გაიყინა. თეთრი სახლის მემორანდუმში აღნიშნულია, რომ აუცილებელია ყველა გადაწყვეტილების რეალიზაციის შეჩერება მათი ახალი ადმინისტრაციის მიერ შესწავლამდე.

შოთა ჩოჩიშვილის სახელობის ძიუდოს აკადემიაში მიმდინარე 2009 წლის ქვეყნის პირველობაზე, თავისუფალი სტილით მოჭიდავეთა შორის ოქროს მედალოსნები გახდნენ 17 წლის გორელი ვლადიმერ ხინჩეგაშვილი - 55 კგ წონით კატეგორიაში, ბოლნისელი მალხაზ ქურდიანი - 60 კგ წონით კატეგორიაში, გორელი მალხაზ მუზიაშვილი - 66 კგ წონით კატეგორიაში და თბილისელი გელა საღირაშვილი - 74 კგ წონით კატეგორიაში. საყოველთაო ყურადღების ცენტრშია 96 კგ წონით კატეგორიაში მოასპარეზე მსოფლიოს 2-გზისა და ევროპის 5-გზის ჩემპიონ ლუკა კურტანიძის გამოსვლა.    

ჭადრაკის სასახლეში მიმდინარე ქვეყნის ჩემპიონატზე, მოქმედი ჩემპიონის რანგში მოასპარეზე ლევან ფანცულაია 3 ქულით ვაჟთა შორის ლიდერობს, ქალთა შორის კი, ასევე 3 ქულით - 15 წლის ნაზი პაიკიძე.  

რუსეთის ფედერაციამ მდინარე ფსოუზე საზღვრის გადალახვის კონტროლი გაამკაცრა და მაკონტროლებელი ახალი შენაერთი დააყენა. "საზღვრის გადალახვის მაკონტროლებელი ახალი შენაერთი შექმნილია ადლერში (სოჭი, კრასნოდარის მხარე) რუსეთ-აფხაზეთის საზღვარზე კონტროლის გამკაცრების მიზნით. შენაერთი საზღვარზე სოჭის 2014 წლის ოლიმპიადის ჩატარებისა და მომზადების პერიოდში იმოქმედებს", იუწყება რუსეთის "ფეესბეს" შავი და აზოვის ზღვების სასაზღვრო სამმართველოს პრესსამსახური.

ეუთო-ს მიერ რუსეთისთვის შეთავაზებული მანდატის ახალი ფორმატი მოსკოვისთვის მისაღებია; როგორც რუსეთის საგარეო საქმეთა მინისტრმა, სერგეი ლავროვმა, ეუთო-ს თავმჯდომარე ქვეყნის - საბერძნეთის საგარეო საქმეთა მინისტრ დორა ბაკოიანთან შეხვედრისას განაცხადა, "ახალ ინიციატივაში გაცილებით უფრო რეალური მიდგომებია ჩადებული და რუსული მხარე მათზე მუშაობის დაწყებას აპირებს". ეუთო-ს მანდატის ახალი ფორმატის დეტალები არ კონკრეტდება. სერგეი ლავროვისა და დორა ბაკოიანის შეხვედრა გრძელდება; სავარაუდოდ, საბერძნეთის ინიციატივის შესახებ უფრო დაწვრილებითი ინფორმაცია მისი დასრულების შემდეგ გახდება ცნობილი.

საქართველო ეუთო-ს საქმიანობის ნებისმიერ ფორმატს მიესალმება, თუ ის ტერიტორიული მთლიანობის საკითხს ეჭვქვეშ არ დააყენებს. როგორც პარლამენტის ევროპასთან ინტეგრაციის კომიტეტის თავმჯდომარე დავით დარჩიაშვილმა განაცხადა, საქართველო დაინტერესებულია, რომ ქვეყანაში რაც შეიძლება მეტი უცხოელი დამკვირვებელი იყოს - "ჩვენთვის მნიშვნელოვანია ეუთო-ს მისიის საქმიანობის განხორციელება არა მხოლოდ აგრესიის აღსაკვეთად, არამედ - ქვეყანაში დემოკრატიული ინსტიტუტების განვითარებისთვისაც".   

საქართველოში ეკონომიკური კატასტროფის თავიდან ასაცილებლად ექსპერტთა დიდი საბჭო შეიქმნება, რომელშიც ქვეყანაში და უცხოეთში მოღვაწე ქართველი ექსპერტები შევლენ; ამის შესახებ განცხადება მიხეილ სააკაშვილმა ექსპერტებთან და პოლიტოლოგებთან შეხვედრისას გააკეთა. მისი თქმით, მსგავსი შეხვედრები სისტემატური ხასიათის უნდა გახდეს - "ხელისუფლება ცდილობს, ოპოზიციასთან ერთად, მსოფლიო კრიზისის დამანგრეველი შედეგები თავიდან აიცილოს. ჩემი ამოცანაა მოსმენა, თქვენი მოსმენა და არა ლექციებისა და ნოტაციების კითხვა". 

"საქართველოს რუსეთისთვის სამხედრო ინსპექტირებაზე უარის სათქმელად კარგი არგუმენტი ჰქონდა", განაცხადა საქართველოში ევროკომისიის წარმომადგენლობის ხელმძღვანელმა. პერ ეკლუნდის განმარტებით, ქართული მხარის გადაწყვეტილება მხოლოდ რუსეთს ეხება - "ვენის კონვენციის თანახმად, სხვა სახელმწიფოებს ინსპექტირების უფლება უნარჩუნდებათ".

საქართველომ, აფხაზეთისა და ცხინვალის რეგიონის დეოკუპაციამდე, რუსეთის ფედერაციის მიმართ ფორს-მაჟორი გამოაცხადა. 1999 წლის ვენის დოკუმენტის შესაბამისად, რომელიც ნდობისა და უსაფრთხოების განმტკიცების ზომებზე მოლაპარაკებებს და ერთი სახელმწიფოს მიერ მეორე სახელმწიფოს ტერიტორიაზე ინსპექციის მოთხოვნას ითვალისწინებს, რუსეთმა ქართული შეიარაღებული ძალების ინსპექტირება მოითხოვა. "რუსეთს მოთხოვნაზე დაუყოვნებლივ ვუთხარით უარი, რომელიც დასაბუთებულია ვენის შეთანხმების 120-ე პუნქტით გათვალისწინებული ფორს-მაჟორით. ფორს-მაჟორი კი, რუსეთის მიერ საქართველოს წინააღმდეგ განხორციელებულ აგრესიაში მდგომარეობს. ჩვენ ნამდვილად გვაქვს გარანტია, რომ რუსეთი ინსპექტირებას საქართველოს ეროვნული უსაფრთხოების ინტერესების წინააღმდეგ გამოიყენებს", განაცხადა საგარეო საქმეთა მინისტრმა, გრიგოლ ვაშაძემ.

დორა ბაკოიანი იმედოვნებს, რომ რუსეთთან შეთანხმებას მიაღწევს და საქართველოში ეუთო-ს მონიტორინგის პროცესის ჩაშლას თავიდან აიცილებს, რაც დასავლეთს ძალადობის შეჩერებაში გადამწყვეტ ფაქტორად მიაჩნია. მისი თქმით, დასავლეთი ცალკე მისიას ვერ გაგზავნის ე. წ. სამხრეთ ოსეთში, რაც სეპარატისტული რეგიონის სუვერენულ სახელმწიფოდ დე ფაქტო ცნობის ტოლფასი იქნებოდა. ეუთო-ს თავმჯდომარე მიიჩნევს, რომ ე. წ. სამხრეთ ოსეთის ცნობის საკითხი შეიძლება გადაილახოს; მან პარალელი გაავლო კოსოვოში საბერძნეთის ევროკავშირის მისიაში მონაწილეობასთან, მიუხედავად ათენის მიერ კოსოვოს არცნობისა - "მოვიძიეთ ფორმულა, რომელმაც ცხადყო, რომ არ ვაღიარებთ კოსოვოს დამოუკიდებლობას, მაგრამ რომელმაც კოსოვოში ყოფნის შესაძლებლობა მოგვცა". დორა ბაკოიანი საკუთარი გეგმის დეტალებს მაშინ გაახმოვანებს, როცა მოსკოვსა და თბილისში გარკვეულ პროგრესს მიაღწევს.

საქართველოს გაზის გამანაწილებელი კომპანია "იტერა-საქართველო" ე. წ. სამხრეთ ოსეთს ბუნებრივ აირს რამდენიმე დღეში მიაწვდის; შესაბამისი ნებართვა კომპანიამ საქართველოს ხელისუფლებისგან მიიღო. რუსულ-ქართული კონფლიქტის დროს დაზიანებული გაზსადენის მილი შეკეთებულია და ტექნიკური საკითხების მოგვარების შემდეგ, ე. წ. სამხრეთ ოსეთი ბუნებრივ აირს მიიღებს.

საქართველომ, აფხაზეთისა და ცხინვალის რეგიონის დეოკუპაციამდე, რუსეთის ფედერაციის მიმართ ფორს-მაჟორი გამოაცხადა. 1999 წლის ვენის დოკუმენტის შესაბამისად, რომელიც ნდობისა და უსაფრთხოების განმტკიცების ზომებზე მოლაპარაკებებს და ერთი სახელმწიფოს მიერ მეორე სახელმწიფოს ტერიტორიაზე ინსპექციის მოთხოვნას ითვალისწინებს, რუსეთმა ქართული შეიარაღებული ძალების ინსპექცია მოითხოვა. "რუსეთს მოთხოვნაზე დაუყოვნებლივ ვუთხარით უარი, რომელიც დასაბუთებულია ვენის შეთანხმების 120-ე პუნქტით გათვალისწინებული ფორს-მაჟორით. ფორს-მაჟორი კი, რუსეთის მიერ საქართველოს წინააღმდეგ განხორციელებულ აგრესიაში მდგომარეობს. ჩვენ ნამდვილად გვაქვს გარანტია, რომ რუსეთი ინსპექციას საქართველოს ეროვნული უსაფრთხოების ინტერესების წინააღმდეგ გამოიყენებს", განაცხადა საგარეო საქმეთა მინისტრმა, გრიგოლ ვაშაძემ.

მიხეილ სააკაშვილმა საქართველოს მოსახლეობის შეკითხვებს უპასუხა. 

გერმანიის მთავრობის მიერ გამოყოფილი 8 მილიონი ევრო რუსულ-ქართული კონფლიქტის შედეგად დაზარალებული მოსახლეობისთვის საცხოვრებელი სახლების მშენებლობას მოხმარდება. სამშენებლო სამუშაოებს გერმანიის ტექნიკური თანამშრომლობის საზოგადოება აწარმოებს. გორთან ახლოს მდებარე სამშენებლო მოედანზე, პროექტის საზეიმო გახსნაში საქართველოს ლტოლვილთა და განსახლების მინისტრი კობა სუბელიანი, გერმანიის ელჩი საქართველოში პატრიცია ფლორი, შიდა ქართლის გუბერნატორი ლადო ვარძელაშვილი და გერმანიის ტექნიკური თანამშრომლობის საზოგადოების დირექტორი სამხრეთ კავკასიაში გაბრიელ ბიორინგერი მიიღებენ მონაწილეობას. სტუმრები, მშენებლობის დაწყების აღსანიშნავად, პირველი სახლის საძირკველის ჩაყრაში მიიღებენ მონაწილეობას. 

გალის რაიონის სოფელ ჭუბურხინჯის მკვიდრის, თენგიზ აქუბარდიას, ავტომანქანას აფხაზმა ბოევიკებმა ცეცხლი გაუხსნეს. თენგიზ აქუბარდიას მეუღლე, ჩვილი ბავშვით, ზუგდიდის რაიონში სამკურნალოდ გადმოსვლას აპირებდა. აფხაზმა ბოევიკებმა მას გადმოსვლის საშუალება არ მისცეს და 300 დოლარი მოსთხოვეს. თენგიზ აქუბარდია მეუღლეს ქართველების მიერ კონტროლირებად ტერიტორიაზე, ზუგდიდის რაიონის სოფელ რუხში ელოდებოდა. მას შემდეგ, რაც მისი მეუღლე ენგურის ხიდზე ვერ გადმოვიდა, იგი მანქანით ხიდის მიმართულებით წავიდა. როგორც კი აფხაზმა ბოევიკებმა ავტომანქანა შენიშნეს, ცეცხლი გაუხსნეს. ავტომანქანას 12 ტყვია მოხვდა, იქ მჯდომი ერთ-ერთი პიროვნება მსუბუქად დაიჭრა.

ე. წ. ნაბუკოს სამიტზე დასასწრებად ქართული დელეგაცია უნგრეთის დედაქალაქში გაემგზავრა. სამიტში ევროკავშირის, აშშ-ის, გერმანიის, თურქეთის, ავსტრიის, ბულგარეთის, რუმინეთის, უნგრეთის, აზერბაიჯანის, ეგვიპტის, საქართველოსა და რამდენიმე სხვა ქვეყნის წარმომადგენლები მიიღებენ მონაწილეობას. ქართულ დელეგაციას, პრემიერ გრიგოლ მგალობლიშვილის ნაცვლად, პირველი ვიცე-პრემიერი ნიკა გილაური ხელმძღვანელობს. ბუდაპეშტში იმყოფება ენერგეტიკის მინისტრი ალექსანდრე ხეთაგურიც. სამიტზე მოსალოდნელია "ნაბუკოს" პროექტის განხორციელების შესახებ გადაწყვეტილების მიღება; შესაბამისი ტენდერი კი, სავარაუდოდ, 2009 წლის ბოლოს, ან 2010 წლის დასაწყისში გამოცხადდება. აღნიშნული პროექტი, პირველ ეტაპზე, ბაქო-თბილისი-ერზერუმის გაზსადენის გაგრძელებაზე ახალი მილსადენის მშენებლობას ითვალისწინებს. "ნაბუკოს" გაზსადენი ევროპის მიმართულებით, საქართველოსა და თურქეთის გავლით, აზერბაიჯანული და შუააზიური გაზის ტრანსპორტირებას უზრუნველყოფს. პირველ ეტაპზე, წელიწადში 30 მილიარდი კუბური მეტრი გაზის ტრანსპორტირებაა დაგეგმილი.

საქართველოს საგარეო საქმეთა მინისტრ გრიგოლ ვაშაძის განცხადებით, "ნაბუკოს" პროექტის განხორციელების შემთხვევაში "ევროპა რუსეთზე დამოკიდებული აღარ იქნება".

"შესაძლოა, ევროსაბჭოს რეზოლუცია რუსეთის მიმართ არ იყოს ისეთი მკაცრი, როგორც ეს ქართულ მხარეს სურს", განაცხადა საქართველოს საგარეო საქმეთა მინისტრმა, გრიგოლ ვაშაძემ. სტრასბურგში ევროსაბჭოს საპარლამენტო ასამბლეის ზამთრის სესია გაიხსნა, სადაც მთავარი საკითხი საქართველო-რუსეთის ურთიერთობა იქნება. პარლამენტი შეაფასებს, თუ როგორ შეასრულეს მხარეებმა 2008 წლის ოქტომბერში მიღებული რეზოლუცია და შედეგებს ახალ რეზოლუციაში ასახავს. წინასწარი ინფორმაციით, აღნიშნულ დოკუმენტში კრიტიკულადაა შეფასებული რუსეთის ქმედებები; საუბარია ოკუპირებულ ტერიტორიებზე ადამიანის უფლებათა დარღვევის ფაქტებსა და ქართველების ეთნიკურ წმენდაზე. მნიშვნელოვანია, რომ რეზოლუციაში პირველადაა ნახსენები ტერმინი ეთნიკური წმენდა. ასამბლეა რუსეთს მოუწოდებს, რომ აფხაზეთსა და ე. წ. სამხრეთ ოსეთში საერთაშორისო დამკვირვებლები დაუყოვნებლივ შეუშვას და გამოთქვამს სინანულს, რომ რუსეთს მოთხოვნათა უმეტესობა ამ დრომდე არ შეუსრულებია. კმაყოფილებას კი იმის გამო გამოთქვამს, რომ რუსმა პარლამენტარებმა ქართველ კოლეგებთან ასამბლეის ეგიდით დიალოგზე უარი არ თქვეს.

4 თებერვალს, ბრიუსელში ჩრდილოატლანტიკური ალიანსის საბჭოს სხდომა გაიმართება, რომელსაც საქართველოს დელეგაცია დაესწრება. საქართველოს საგარეო საქმეთა მინისტრ გრიგოლ ვაშაძის განცხადებით, სხდომაზე საქართველოს მიერ IPAP-ითა და ინტენსიური დიალოგით გათვალისწინებული მოთხოვნების შესრულების პროცესი შეფასდება - "საქართველო ჩრდილოატლანტიკური ალიანსის საბჭოს სხდომაზეა მიწვეული, რომელზეც ნატო-ში გაწევრიანების საფეხურებით გათვალისწინებული მოთხოვნების შესრულებას შეაფასებენ".

ბრიუსელში ნატო-რუსეთის საბჭოს არაფორმალური, დახურული სხდომა გაიმართება, რომელზეც რუსული მხარე აგვიტოს ომის საკითხს კიდევ ერთხელ დააყენებს, ამის შესახებ ნატო-ში რუსეთის ფედერაციის წარმომადგენელმა, დიმიტრი როგოზონმა, განაცხადა - "კავკასიაში აგვისტოს მოვლენებმა აჩვენა, რომ ევროპის უსაფრთხოების გადაჯგუფების ინიციატივა, რომელიც რუსეთის პრეზიდენტმა ბერლინში ჯერ კიდევ სამხრეთ ოსეთის წინააღმდეგ საქართველოს აგრესიამდე დააყენა, სწორია". მისი ინფორმაციით, ასევე განიხილება ალიანსისა და რუსეთის ურთიერთობებში შექმნილი პრობლემების მიზეზები, მეკობრეების წინააღმდეგ ბრძოლაში თანამშრომლობისა და ავღანეთის საკითხები.

"რუსეთსა და ნატო-ს შორის დიალოგი აღდგება; ორივე მხარემ განაცხადა, რომ ეცდებიან განაახლონ მუშაობა და ეს მოულოდნელი არ უნდა იყოს", განაცხადა საქართველოს საგარეო საქმეთა მინისტრმა, გრიგოლ ვაშაძემ. ჩრდილოატლანტიკურმა ალიანსმა, რუსეთის მიერ საქართველოს წინააღმდეგ განხორციელებული სამხედრო აგრესიის შემდეგ, ოფიციალურ მოსკოვთან თანამშრომლობის ყველა ფორმატი შეაჩერა.  

დორა ბაკოიანი ცხინვალის რეგიონისთვის გაზის მიწოდების განახლებას მიესალმება. "ეუთო არ დაიშურებს ძალისხმევას და იზრუნებს სხვა სასწრაფო ჰუმანიტარული საჭიროებების, მათ შორის - წყლით მომარაგების პრობლემის მოგვარებისთვის", ნათქვამია ორგანიზაციის თავმჯდომარის ოფიციალურ განცხადებაში. 

რუსული სამხედრო აგრესიისას გამოჩენილი საბრძოლო მამაცობისთვის მე-4 ქვეითი ბრიგადა დაჯილდოვდა. 130-ათ სამხედრო მოსამსახურეს სხვადასხვა სახის მედალი გადაეცა; მედალი "საბრძოლო იარისათვის" 43-მა სამხედრომ მიიღო, "ქაქუცა ჩოლოყაშვილი" - 45-მა. 11 სამხედრო პირს მედალი "სამშობლოსათვის თავდადებული" გადაეცა, 20-ს - "სიცოცხლის გადარჩენისათვის", 11-ს - "გიორგი კვინიტაძე". დაჯილდოების საზეიმო ცერემონია, რომელსაც სახმელეთო ჯარების სარდლის მოადგილე, პოლკოვნიკი კობა ლაჭყეპიანი დაესწრო, მეოთხე ქვეითი ბრიგადის ტერიტორიაზე შედგა. სამხედროები ბრიგადის კაპელანმა, მამა ნაზარემ დალოცა.

ბარაკ ობამამ და დიმიტრი მედვედევმა უახლოეს პერიოდში ერთმანეთთან შეხვედრის სურვილი გამოთქვეს; შესაბამისი განცხადება პრეზიდენტებმა სატელეფონო საუბრისას გააკეთეს - მედვედევმა ობამას პრეზიდენტის მოვალეობის შესრულების დაწყება მიულოცა და  წარმატებები უსურვა. სატელეფონო საუბრისას მათ რუსულ-ამერიკული ურთიერთობების აღდგენისა და მსოფლიო ფინანსურ კრიზისთან ერთობლივი ბრძოლის შესახებ ისაუბრეს. აშშ-ს პრეზიდენტი რუსეთში, შესაძლოა, აპრილში, პირველი ევროპული ტურნეს ფარგლებში ჩავიდეს, რომელიც 2 აპრილს, ლონდონში დიდი ოცეულის სამიტით იწყება. 
 

სოხუმში დე ფაქტო შინაგან საქმეთა მინისტრის მოადგილე ზაკან ჯუღელია მოკლეს; 
ინფორმაცია სერგეი ბაღაფშმა დაადასტურა - "ჯუღელია 26 იანვარს ქალაქის ერთ-ერთ კაფეში იჯდა, როდესაც მას ორჯერ ესროლეს". სისხლის სამართლის საქმე განზრახ მკვლელობის მუხლით აღიძრა. სოხუმის დე ფაქტო პროკურორ ალისა ბიგვავას ინფორმაციით, კაფე "კიკი"-სთან ავტომობილი გაჩერდა, საიდანაც ნიღბიანი პირი გადმოვიდა და ჯუღელიას ესროლა. სეპარატისტები მკვლელობის ორ ვერსიაზე მუშაობენ, ორივე ქართულ მხარესთან არის დაკავშირებული. "ზაკან ჯუღელია 1992-1993 წლებში საქართველოს წინააღმდეგ საბრძოლო მოქმედებების აქტიური მონაწილე და 2008 წლის აგვისტოში კოდორის ხეობის სამხედრო ოპერაციის ერთ-ერთი ხელმძღვანელი იყო. ცნობილია, რომ ამის გამო მას არაერთხელ დაემუქრნენ", აცხადებენ დე ფაქტო შინაგან საქმეთა სამინისტროში, თუმცა არ განმარტავენ, კონკრეტულად ვინ ემუქრებოდა ჯუღელიას. მეორე ვერსიის მიხედვით კი, მას ქართველი კრიმინალური ავტორიტეტები "ემუქრებოდნენ"; აფხაზური "გამოძიების" ინფორმაციით, ჯუღელიამ საქართველოდან აფხაზეთზე გამავალი "ნარკოტრაფიკი აღკვეთა", რამაც ქართველი კრიმინალების უკმაყოფილება გამოიწვია. 

დეპუტატი გია ცაგარეიშვილი სისხლის სამართლის პასუხისმგებლობის ასაკის მინიმალური ზღვარის შეცვლას ითხოვს; ამის შესახებ მან ადვოკატ ლევან ადეიშვილთან ერთად გამართულ პრესკონფერენციაზე განაცხადა. ლევან ადეიშვილის თქმით, დღემდე არ არის გაზიარებული გაერთიანებული ერების ორგანიზაციის ბავშვთა უფლებების კომიტეტის რეკომენდაცია და დაბეჯითებითი მოწოდება (14 წელი - სისხლის სამართლის პასუხისმგებლობის ასაკის მინიმალური ზღვარი). გია ცაგარეიშვილს ალტერნატიული წინადადებაც აქვს - თუ მინიმალური ზღვარი არ შეიცვლება, კოდექსში ჩაიწეროს, რომ 12-დან 14 წლამდე არასრულწლოვანის მიმართ არ გამოიყენება სასჯელის სახით თვისუფლების აღკვეთა; შესაბამისად, 88-ე მუხლის მე-2 ნაწილი, რომელიც განსაზღვრავს სანქციის განახევრებას და საბოლოო სასჯელს, კოდექსიდან ამოღებულ იყოს.  

ბუდაპეშტში ენერგეტიკული სამიტი გაიხსნა, სადაც ნაბუკოს პროექტი, ბუნებრივი აირის ტრანზიტორი და მომწოდებელი ქვეყნების საკითხები განიხილება. დღევანდელ სხდომაზე დაგეგმილია ნაბუკოს პროექტის განხორციელების ტექნიკური განხილვა. სამიტს აღნიშნულ პროექტში მონაწილე ქვეყნების წარმომადგენლები და ერაყის ენერგეტიკის მინისტრი ესწრებიან. ქართულ დელეგაციას საქართველოს ვიცე-პრემიერი, ფინანსთა მინისტრი ნიკა გილაური ხელმძღვანელობს, რომელიც, სამიტის ფარგლებში, ევროკავშირის თავმჯდომარე ქვეყნის - ჩეხეთის პრემიერ-მინისტრ მირეკ ტოპოლანეკს შეხვდა. მხარეებმა საქართველო-ევროკავშირის ურთიერთობებზე, ენერგეტიკულ საკითხებსა და ნაბუკოს პროექტში საქართველოს როლზე ისაუბრეს. როგორც ნიკა გილაურმა განაცხადა, ევროგაერთიანება საკმაოდ მნიშვნელოვან როლს ასრულებს საქართველოს, როგორც პოლიტიკურ, ისე - ეკონომიკურ ცხოვრებაში.

ნატო-ს გენერალური მდივანი იაპ დე ჰოოპ შეფერი რუსეთთან პოლიტიკურ დონეზე კონტაქტების განახლების შესახებ ალიანსის ხელმძღვანელობის გადაწყვეტილებას ადასტურებს. რუსეთ-საქართველოს ომის შედეგად შეწყვეტილი ნატო-რუსეთის ურთიერთობების აღდგენის მიზნით, სხეფერი 6-8 თებერვალს მიუნხენში, უსაფრთხოების 45-ე საერთაშორისო კონფერენციაზე, რუსეთის ხელისუფლების დელეგაციასთან აპირებს შეხვედრას. "ამ შეხვედრაზე კონტაქტებს პოლიტიკურ დონეზე აღვადგენთ. ჩვენც და რუსეთსაც გვჭირდება, ვიპოვოთ გზა ახალი ურთიერთობებისთვის", განაცხადა ნატო-ს გენერალურმა მდივანმა და დასძინა, რომ ურთიერთობების სწრაფი აღდგენის პერსპექტივა ამჟამად სრულად გახსნილია და არაა გამორიცხული, ეს უკვე თებერვლის მეორე ნახევარში მოხდეს.

ევროსაბჭოს საპარლამენტო ასამბლეის მიერ რეზოლუციის მიღებისას, ქართული დელეგაცია დოკუმენტის პროექტში რუსეთის მიმართ უფრო მკაცრი პოზიციის დაკავებას მოითხოვს.  

კონსტიტუციური უსაფრთხოების დეპარტამენტმა, გატარებული ოპერატიულ-სამძებრო ღონისძიებების შედეგად, დააკავა სს "გლობალ ერთის" გენერალური დირექტორი გიორგი მაჩიტიძე, კონტროლის პალატის საფინანსო-სამეურნეო დეპარტამენტის უფროსი თორნიკე გვაზავა და "საქართველოს ბანკის" თანამშრომელი დავით კვასხვაძე. როგორც კუდ-ის უფროსის მოადგილე სოსო თოფურიძემ განაცხადა, "გლობალ ერთმა" ტენდერში კორუფციული გარიგების შედეგად გაიმარჯვა.

აფხაზმა ბოევიკებმა შამგონა-თაგილონის დამაკავშირებელი ხიდი ააფეთქეს, რის შემდეგაც ცეცხლსასროლი იარაღით ჰაერში სროლა გააჩაღეს. აღნიშნული ხიდი, ბოლო პერიოდში, რაიონების დამაკავშირებელი ერთადერთი საშუალება იყო. შემთხვევის ადგილზე გაერო-სა და ეუთო-ს დამკვირვებლები იმყოფებოდნენ. 

რუსეთის ფედერაციის მასობრივი ინფორმაციის საშუალებებმა კრემლის პრესსამსახურზე დაყრდნობით გაავრცელეს ცნობა, რომლის მიხედვითაც, რუსეთის პრეზიდენტმა დსთ-ის მიმდებარე ქვეყნებთან რუსეთის ფედერაციის საზღვრის დელიმიტაცია-დემარკაციის სფეროში თავის სპეციალურ წარმომადგენლად დანიშნა საგანგებო დავალებათა ელჩი გოლოვინი, რომელსაც, ბრძანებულების თანახმად, დაევალა ფედერაციის საზღვრის დელიმიტაცია-დემარკაცია "აფხაზეთთან" და "სამხრეთ ოსეთთანაც".

საქართველოს საგარეო საქმეთა სამინისტრო ეხმაურება აღნიშნულ გადაწყვეტილებას და აცხადებს, რომ "რუსეთის ფედერაციის ეს ნაბიჯი კიდევ ერთხელ ცხადყოფს რუსეთის მისწრაფებას, ვირტუალური რეალობა სინამდვილედ მოაჩვენოს საერთაშორისო თანამეგობრობას. რუსეთი ცდილობს, მოახდინოს მის მიერ შექმნილი მარიონეტული რეჟიმების ლეგიტიმაცია, რომლებიც კრემლმა სუვერენული სახელმწიფოს ტერიტორიების ანექსიის მცდელობითა და საქართველოს ოკუპირებულ ტერიტორიებზე მრავალგზის განხორციელებული ეთნიკური წმენდის შედეგად მოიყვანა ხელისუფლებაში".

ევროსაბჭოს საპარლამენტო ასამბლეის იურიდიულ საკითხთა კომიტეტი პროტესტის ნიშნად რუსეთის დელეგაციის წევრმა - სერგეი მარკოვმა დატოვა. სხდომის დატოვების მიზეზი რეზოლუციის პროექტზე მუშაობისას დელეგაციებს შორის აზრთა სხვადასხვაობა გახდა. როგორც მარკოვი აცხადებს, მას საკუთარი პოზიციის დაფიქსირების საშუალება არ მისცეს. იგი მიიჩნევს, რომ დოკუმენტი რეალურ ფაქტებს არ ასახავს, შესაბამისად - რუსეთი მას არ   შეასრულებს. ქართული მხარის განცხადებით, რუსული დელეგაციის გაღიზიანება გამოიწვია იმ ფაქტმა, რომ რეზოლუციის პროექტში რუსეთის მიმართ პოზიცია გამკაცრდა და მასში ჩადებულია მოწოდება ფედერაციისადმი, მხარი დაუჭიროს საქართველოში ეუთო-ს მისიის მუშაობის გაგრძელებას. დოკუმენტი საბოლოოდ საპარლამენტო ასამბლეამ უნდა დაამტკიცოს. 

რუსი სერჟანტი ალექსანდრე გლუხოვი საქართველოს პრეზიდენტს თავშესაფარს სთხოვს; მისი განცხადებით, ქვეითთა ბატალიონი, რომლის შემადგენლობაშიც ის მსახურობდა, ცხინვალის რეგიონში 2008 წლის ივნისში ჩავიდა, სადაც სანგრები გაათხრევინეს და ბრძოლისთვის მოამზადეს; ომის დასრულების შემდეგ კი, გადაიყვანეს ახალგორში, სადაც გაუსაძლის პირობებში იმყოფებოდა. ალექსანდრე გლუხოვის ინფორმაციით, უკვე ივნისსა და ივლისში, ცხინვალის რეგიონში მობილიზებული იყო მძიმე ტექნიკა და "გრადის" ტიპის საარტილერიო დანადგარები.

"საქართველოში რუსეთის ინტერვენციამ კიდევ ერთხელ გაგვახსენა, რომ ამ უკანასკნელის სამხედრო პოტენციალი კვლავ გასათვალისწინებელია აღმოსავლეთ ევროპასა და კავკასიასთან მიმართებაში", განაცხადა აშშ-ის თავდაცვის მდივანმა კონგრესის საკომიტეტო მოსმენისას. რობერტ გეითსის აზრით, ამერიკას არ უნდა აერიოს ერთმანეთში ოფიციალური მოსკოვის მიერ თავის საზღვრებთან დომინირების მცდელობა და მთელ მსოფლიოზე გავლენის მოპოვების სურვილი, როგორც ეს ცივი ომის დროს იყო. მისი თქმით, რუსეთის შეიარაღებული ძალები, 90-იან წლებთან შედარებით, საგრძნობლად არის მოდერნიზებული, "თუმცა, საბჭოთა არმიასთან შედარებით, ის მხოლოდ აჩრდილს წარმოადგენს". აშშ-ის თავდაცვის მინისტრმა ისაუბრა რუსეთის გააქტიურებაზე ლათინურ ამერიკაში და ხუმრობით აღნიშნა, "ქართულ-რუსული კონფლიქტი რომ არ მომხდარიყო, ამერიკა რუსეთის ხომალდებს მაიამიშიც კი მიიწვევდა".

ივანე ჯავახიშვილის სახელობის საქართველოს ისტორიისა და ეთნოლოგიის ინსტიტუტში აფხაზეთის ავტონომიური რესპუბლიკის განათლებისა და კულტურის სამინისტროს პროგრამით გამოცემული წიგნის - "ნარკვევები საქართველოს ისტორიიდან/აფხაზეთი" - განხილვა შედგება. წიგნის ერთ-ერთი ავტორის, აფხაზეთის უმაღლესი საბჭოს დეპუტატის, პროფესორ ჯემალ გამახარიას განცხადებით, სეპარატისტები და მათი მოსკოველი მფარველები განსაკუთრებულ ყურადღებას აფხაზეთის ისტორიაზე ამახვილებენ და ამტკიცებენ, რომ "აფხაზეთის დამოუკიდებლობას ისტორიული საფუძვლები აქვს".

საქართველოში ევროკავშირის სადამკვირვებლო მისია შეშფოთებას გამოთქვამს მისი ერთ-ერთი საპატრულო ჯგუფის მახლობლად გუშინ გახსნილი ცეცხლის გამო, რომელიც ოძისში, ქართული საგუშაგოს მახლობლად, პატრულირებას ახორციელებდა. "ჩვენი დამკვირვებლები არ არიან შეიარაღებულნი და უფლება აქვთ, შეუფერხებლად განახორციელონ პატრულირება. მომხდარი სარკოზი-მედვედევის შეთანხმების დარღვევაა", განაცხადა მისიის ხელმძღვანელმა, ჰანსიორგ ჰაბერმა.

საქართველოს სოფლის მეურნეობის სამინისტროს სურსათის უვნებლობის, ვეტერინარიისა და მცენარეთა დაცვის ეროვნული სამსახურის უფროსი ლევან ორკოშნელი დააკავეს . ის უკანონო გარიგებებსა და გადასახადების დამალვაშია ეჭვმიტანილი. გამოძიების წინასწარი ინფორმაციით, ეჭვმიტანილმა 2006 წლის აპრილში კანონის დარღვევით ხელშეკრულება გაუფორმა შპს "მესკალინს". ამავე შპს-ს მხრიდან ხელშეკრულებით გათვალისწინებული პირობების დარღვევის მიუხედავად, ლევან ორკოშნელმა არ შეასრულა კანონით მასზე დაკისრებული მოვალეობა და არ დააკისრა შპს "მესკალინს" საჯარიმო სანქციები, უფრო მეტიც, მომწოდებელთან გააფორმა დამატებითი შეთანხმებები, რითაც ერთპიროვნულად შეცვალა ყველა მიწოდების ვადა. შედეგად, სახელმწიფო ბიუჯეტს მიადგა 122 ათასი ლარის ზარალი. მეორე ფაქტი კი, ინდმეწარმე ლევან ზენაიშვილთან უკანონო გარიგებას ეხება, რომლის დროსაც მეწარმემ ბიუჯეტიდან 151 ათასი ლარი მიიტაცა. ზენაიშვილი იმალება. ლევან ორკოშნელი გადაიყვანეს წინასწარი დაკავების იზოლატორში. მან გამოძიებას უკვე მისცა პირველადი ჩვენება.

მომხდარ ფაქტზე კომენტარი გააკეთა სოფლის მეურნეობის მინისტრმა. ბაკურ კვეზერელმა განაცხადა, რომ ბრალდება, რომელიც წაუყენეს ორკოშნელს, საკმაოდ მძიმე დანაშაულია, რომელიც შეიძლება სახელმწიფო მოხელემ ჩაიდინოს. სამინისტროს ხელმძღვანელობა აპირებს, გამოითხოვოს ყველა დოკუმენტაცია, რომელიც ინახებოდა ორკოშნელთან, ასევე - შეამოწმოს ყველა იმ ხელშეკრულების კანონიერება, რომლებიც მას ჰქონდა დადებული სხვადასხვა საწარმოსთან. კვეზერელის განცხადებით, არ არის გამორიცხული, სხვა თანამშრომლების ბრალეულობაც გამოიკვეთოს.

რუსეთმა შეაჩერა სამუშაოები კალინინგრადის ოლქში ტაქტიკური სარაკეტო კომპლექსის განთავსებასთან დაკავშირებით, რომელიც ევროპაში ამერიკული რაკეტსაწინააღმდეგო სისტემის განლაგების შემთხვევაში საპასუხო ნაბიჯი უნდა გამხდარიყო. რუსეთის შეიარაღებული ძალების გენშტაბის წარმომადგენელზე დაყრდნობით, "ინტერფაქსი" იუწყება, რომ "ისკანდერების" განთავსება შეჩერებულია, რადგან აშშ-ის ახალი ადმინისტრაცია არ ჩქარობს პოლონეთსა და ჩეხეთში რაკეტსაწინააღმდეგო სისტემის გაშლას. აქედან გამომდინარე, რუსეთი თავისი რაკეტების განლაგების საჭიროებას ვერ ხედავს.

ლტოლვილთა და განსახლების მინისტრმა აფხაზეთიდან დევნილები მოინახულა, რომლებიც ვარკეთილში, ყოფილი უნივერმაღის შენობაში 1997 წლიდან ცხოვრობენ. კობა სუბელიანის განცხადებით, დევნილებს სახელმწიფო საკუთრებაში არსებული ეს შენობა საცხოვრებელ ფართებად დაუკანონდებათ.

სტრასბურგში მიმდინარე ევროსაბჭოს საპარლამენტო სესიაზე რუსეთი ვალდებულებების შეუსრულებლობის გამო მკაცრად გააკრიტიკეს და აღნიშნეს, რომ საქართველოს ევროსაბჭოს რეზოლუციით დაკისრებული ვალდებულებების დიდი ნაწილი შესრულებული აქვს, რუსეთს კი - არა. ქართული დელეგაციის მხრიდან სესიაზე მოხსენებით საპარლამენტო უმრავლესობის ლიდერი პეტრე ცისკარიშვილი და "ქრისტიან-დემოკრატიული მოძრაობის" ლიდერი  გიორგი თარგამაძე გამოვიდნენ, რუსეთის მხრიდან - კონსტანტინ კოსაჩოვი, საქართველო-რუსეთის კონფლიქტის მომხსენებლებიდან ევროსაბჭოში - მათიას იორში და ლუკ ვან დერ ბრანდე. კოსაჩოვის განცხადებით, თუ რუსეთი ევროსაბჭოს მოთხოვნებს შეასრულებს, "ამას მოჰყვება ახალი ომი". ცისკარიშვილმა ასამბლეას მოუწოდა, თავისი პრინციპების ერთგული დარჩეს, თარგამაძემ კი, რუსეთის მიერ აფხაზეთსა და ე. წ. სამხრეთ ოსეთში საელჩოების გახსნისა და სამხედრო ბაზების მშენებლობის შესახებ ისაუბრა. ლუკ ვან დერ ბრანდეს განცხადებით, "რეალობაა კი ისაა, რომ საქართველოს დიდი ნაწილი ვალდებულებების შესრულებული აქვს, რუსეთს კი - არა. ამ დრომდე საერთაშორისო დამკვირვებლებს არ უშვებენ აფხაზეთსა და ე. წ. სამხრეთ ოსეთში". მათიას იორშის თქმით, რუსეთის მიერ სეპარატისტების აღიარება უდიდესი პრობლემაა - "რუსეთი აცხადებს ახალ რეალობას, რაც მიუღებელია".    
 

რუსეთის "პომესტნი სობორმა" მოსკოვისა და სრულიად რუსეთის პატრიარქად სმოლენსკისა და კალინინგრადის მიტროპოლიტი კირილი აირჩია. პატრიარქის კურთხევა პირველ თებერვალს გაიმართება. არჩევნების დაწყებამდე, მიტროპოლიტმა კირილმა რუსეთ-საქართველოს ურთიერთობებზე ისაუბრა და ხაზი გაუსვა იმ გარემოებას, რომ აწგარდაცვლილი ალექსი მეორე ამ ურთიერთობების აღდგენისკენ ისწრაფვოდა. მან გასული წლის ყველაზე მნიშვნელოვან მოვლენად რუსეთისა და საქართველოს საპატრიარქოების წარმომადგენლების შეხვედრა დაასახელა. 

ახალი სოციალური პროგრამის ფარგლებში, ხელმოკლე ოჯახები თითო ბავშვზე ოცლარიან დახმარებას მიიღებენ; ამის შესახებ თბილისის მერმა, გიგი უგულავამ, გელაშვილების ათსულიან ოჯახში სტუმრობისას განაცხადა - "წელს ყველა რესურსი, რაც იქნება ცენტრალურ თუ თბილისის ბიუჯეტში, უნდა მივმართოთ სოციალურ ხარჯებზე; იმის გამო, რომ ბიზნესი გაჩერებულია, გვაქვს მძიმე პერიოდი და ეს ყველამ ერთად უნდა გადავიტანოთ". 

ნატო-ს ოფიციალურმა წარმომადგენელმა, ჯეიმს აპატურაიმ, განაცხადა, რომ ალიანსის გენერალური მდივნის ვიზიტი რუსეთში, ჯერჯერობით, არ იგეგმება და რომ აპრილისთვის დაგეგმილ ნატო-ს სამიტზე რუსეთს არ მიიწვევენ - "ჩვენ "ოჯახურ სამიტს" ვგეგმავთ; მისი ფორმატი არ ითვალისწინებს ალიანსის არაწევრი ქვეყნების მონაწილეობას". აპატურაიმ აღნიშნა, რომ ნატო-ს წევრი ყველა ქვეყანა რუსეთთან დისკუსიების გამართვის მიმართ (ნატო-რუსეთის საბჭოს ფარგლებში) დადებითად არის განწყობილი.

"ქრისტიან-დემოკრატები" საზოგადოებრივი მაუწყებლის ბორდის დაკომპლექტების წესის შეცვლისა და მისი დათხოვნის პროცედურის გაწერის ინიციატივით გამოდიან. ლევან ვეფხვაძის განცხადებით, საზოგადოებრივი მაუწყებლის ბორდი პროფესიული ნიშნით უნდა იყოს დაკომპლექტებული და არა - პოლიტიკურით, როგორც ეს დღეს არის. რაც შეეხება დათხოვნის საკითხს - ეს პროცედურა კანონში უნდა აისახოს.

სოფელ ნაბაკევში, ქართველ სამართალდამცავებს ცეცხლი სეპარატისტებმა ჭუბურხინჯიდან გაუხსნეს. ინციდენტის შედეგად არავინ დაშავებულა, შემთხვევის ადგილს ევროპელი დამკვირვებლები სწავლობენ. ამავე სოფლის მკვიდრი კობა მებონია მთვრალი რუსი ჯარისკაცების მსხვერპლი გახდა. ისინი მოკლული მებონიას ოჯახის წევრებს ცხედართან ამ დრომდე არ უშვებენ.

სრულიად საქართველოს კათოლიკოს-პატრიარქმა ილია მეორემ სმოლენსკისა და კალინინგრადის მიტროპოლიტ კირილს რუსეთის საპატრიარქო ტახტზე არჩევა წერილობით მიულოცა - ჯანმრთელობა, სულიერი სიმტკიცე და ღვთის შეწევნა უსურვა.

სრულიად საქართველოს კათოლიკოს- პატრიარქი, უწმინდესი და უნეტარესი ილია მეორე რუსეთის პატრიარქის ინტრონიზაციაში მონაწილეობას ვერ მიიღებს; როგორც უწმინდესმა ბრძანა, ექიმებმა მას რამდენიმე დღით საავადმყოფოში დარჩენა ურჩიეს, მოსკოვში საქართველოს საპატრიარქოს დელეგაცია გაემგზავრება. ილია მეორემ მრევლს, სამღვდელოებას და მედიკოსებს მასზე ზრუნვისთვის მადლობა გადაუხადა. პატრიაქმა ბრძანა, რომ მალე გამოჯანმრთელდება და კარგად იქნება. 

ევროსაბჭოს საპარლამენტო ასამბლეამ 118 ხმით 25-ის წინააღმდეგ მიიღო რეზოლუცია, რომელიც საქართველო-რუსეთის ომის შედეგების შესახებ საპარლამენტო ასამბლეის 2008 წლის ოქტომბრის რეზოლუციის შესრულებას ეხება. ასამბლეამ ქართული დელეგაციის მიერ რეზოლუციის პროექტში წარმოდგენილი შესწორებების ძირითადი ნაწილი მოიწონა. დოკუმენტში არ იყო გათვალისწინებული რუსეთის მიერ წარმოდგენილი თითქმის არც ერთი არსებითი შესწორება. ქართული მხარის მიერ წარმოდგენილი შესწორების შედეგად, ასამბლეა ადასტურებს საქართველოს ტერიტორიულ მთლიანობას და სუვერენიტეტს. იგი მოუწოდებს რუსეთს, გაიყვანოს შეიარაღებული ძალები საქართველოს რეგიონებიდან; "ასამბლეა გმობს ე. წ. სამხრეთ ოსეთისა და აფხაზეთის აღიარებას რუსეთის მიერ, საერთაშორისო სამართლისა და ევროსაბჭოს პრინციპების გვერდის ავლით". კიდევ ერთი დამატება რეზოლუციაში საქართველოს კონფლიქტურ რეგიონებში საერთაშორისო ორგანიზაციების მუშაობას ეხება; "რუსეთმა უნდა დაუჭიროს მხარი ეუთო-ს მისიის მუშაობას საქართველოში, არ უნდა შეუშალოს ხელი ევროკავშირის სადამკვირვებლო მისიის მუშაობას ე. წ. სამხრეთ ოსეთისა და აფხაზეთის ტერიტორიაზე".

საქართველოს საგარეო საქმეთა სამინისტრო ევროსაბჭოს საპარლამენტო ასამბლეის მიერ მიღებულ რეზოლუციას მიესალმება და იმედს გამოთქვამს, რომ ოფიციალური მოსკოვი საბოლოოდ შესძლებს საერთაშორისო ვალდებულებების, მათ შორის - ექვსპუნქტიანი შეთანხმების შესრულებას. ქართული მხარე ასევე იმედოვნებს, რომ რუსეთის ხელისუფლება ევროპული ორგანიზაციების მკაფიო გზავნილებს გაითვალისწინებს. განცხადებაში ნათქვამია, რომ ახალ რეზოლუციაში ასამბლეა კვლავ ადასტურებს ოქტომბრის რეზოლუციის სრულ მხარდაჭერას და აცხადებს, რომ საქართველომ ასამბლეის მიერ წაყენებული უმეტესი მოთხოვნები შეასრულა, რუსეთმა კი, რეზოლუციის ძირითადი მოთხოვნები არ გაითვალისწინა.

"ევროპამ უკან არ დაიხია; მიუხედავად რუსული მხარის წინააღმდეგობისა, კიდევ ერთხელ მკაფიოდ სთხოვს რუსეთს, უარი თქვას აფხაზეთისა და ე. წ. სამხრეთ ოსეთის აღიარებაზე. ეს ძალიან მნიშვნელოვანია, ვინაიდან ამ მოთხოვნის შეუსრულებლობის შემთხვევაში, რუსეთის მიმართ სანქციების მიღების საკითხი დადგება", განაცხადა პარლამენტის თავმჯდომარე დავით ბაქრაძემ. მისი თქმით, მნიშვნელოვანია, რომ ევროსაბჭო რუსეთს ეთნიკური წმენდის შეჩერებასა და შეიარაღებული ძალების საქართველოს ტერიტორიიდან გაყვანას სთხოვს.

ევროპული ინტეგრაციის კვლევის ცენტრის ხელმძღვანელი ვასილ ჭყოიძე რუსეთ-საქართველოს ომთან დაკავშირებით ევროსაბჭოს რეზოლუციას საქართველოს სერიოზულ მხარდაჭერად აფასებს. როგორც მან განაცხადა, ახალი რეზოლუციის მიმართ სასაყვედურო არაფერი  უნდა გვქონდეს, ვინაიდან მასში ქართული მხარის ყველა  მოთხოვნა აისახა. მისი აზრით, ძალიან მნიშვნელოვანია ის გარემოება, რომ ევროსაბჭომ რუსეთისგან კვლავ მოითხოვა აფხაზეთიდან და ე. წ. სამხრეთ ოსეთიდან სამხედრო ძალების გაყვანა, სეპარატისტული რეგიონების დამოუკიდებლობის აღიარების უკან გაწვევა. გარდა ამისა, მიუთითა, რომ ვითარება კონფლიქტის ორივე ზონაში უსაფრთხო არ არის; რუსეთი ბლოკავს საერთაშორისო მისიებისა და საერთაშორისო ორგანიზაციების ჰუმანიტარული აქციების ორგანიზებას. "რეზოლუცია ევროსაბჭოს მხრიდან საქართველოსთვის სერიოზული მხარდაჭერაა. ევროსაბჭოს რეკომენდაციების შეუსრულებლობას რუსეთის მიმართ სანქციები მოჰყვება", განაცხადა ჭყოიძემ.

პარლამენტის ვიცე-სპიკერ პაატა დავითაიას შეფასებით, რუსეთმა ევროსაბჭოსგან სერიოზული გაფრთხილება მიიღო. მისი თქმით, რეზოლუცია რუსეთ-საქართველოს დიპლომატიურ ფრონტზე სერიოზული წინსვლაა - "მართალია, ევროსაბჭოს დოკუმენტი სარეკომენდაციოა, მაგრამ რუსეთი ვალდებულია, შეასრულოს, თუ ევროსაბჭოს წევრ სახელმწიფოებთან თანაცხოვრება სურს".

საქართველოს ლტოლვილთა და განსახლების მინისტრმა და მსოფლიო ბანკის ვიცე-პრეზიდენტმა სოფელი შავშვები მოინახულეს, სადაც რუსეთის აგრესიის შედეგად დაზარალებული ოჯახებისთვის, მსოფლიო ბანკის დაფინანსებით, სახლები აშენდა.

საქართველოს პრეზიდენტის მიერ პარლამენტში წარმოდგენილ საკონსტიტუციო ცვლილებების კანონპროექტთან დაკავშირებით, "საქართველოს დემოკრატიული პარტიის" გენერალურ მდივან გია ცაგარეიშვილსა და პარტიის პოლიტსაბჭოს წევრ ზურაბ ჯიბღაშვილს შენიშვნები გააჩნიათ. მათი აზრით, პრეზიდენტი ტყუის - პარლამენტის უფლებები არ იზრდება, პრეზიდენტის უფლებები კი, მხოლოდ ერთადერთ ასპექტში მცირდება; ის ფორმალურად იზღუდება პარლამენტის დათხოვნაში. "უნდა განხორციელდეს პრეზიდენტის დისტანცირება აღმასრულებელ ხელისუფლებასთან. მხოლოდ მას შემდეგ ექნება აზრი უნდობლობის გამოცხადების გამარტივებაზე საუბარს, რაც პრეზიდენტი აღარ იქნება მთავრობის ხელმძღვანელი", აცხადებს ცაგარეიშვილი.

საქართველოს საგარეო საქმეთა მინისტრი ესპანეთში გაემგზავრა; ვიზიტის მთავარი მიზანი საქართველოში ესპანური კაპიტალის მაქსიმალური მოზიდვაა. გრიგოლ ვაშაძე ესპანელ კოლეგას - მიგელ ანხელ მორატინოსს შეხვდება. დაგეგმილია შეხვედრა ესპანურ საწარმო ორგანიზაციათა საბჭოს პრეზიდენტ ხერარდო დიაზ ფერანისთან. "შეხვედრებზე საუბარი სავიზო რეჟიმის გამარტივების, ესპანური კაპიტალის საქართველოში შემოდინების პერსპექტივების და საქართველოს ესპანურ ბაზარზე გასვლის საკითხებს შეეხება", განაცხადა ვაშაძემ. 

მოქალაქეობისა და მიგრაციის საკითხების განხილვა 2009 წლის 1 თებერვლიდან იუსტიციის სამინისტროს სამოქალაქო რეესტრის სააგენტოს ფუნქციაში შევა. ამ უფლებამოსილებას აქამდე იუსტიციის სამინისტროს ცენტრალური აპარატი ახორციელებდა. როგორც პრესკონფერენციაზე სამოქალაქო რეესტრის სააგენტოს თავმჯდომარე გიორგი ვაშაძემ განაცხადა, მომავალში მომსახურება კიდევ უფრო გაფართოვდება, პირველი თებერვლიდან კი, მოქალაქეები ერთი ფანჯრის პრინციპით ისარგებლებენ. დამატებითი ინფორმაციის მიღება მოქალაქეებს შეუძლიათ სამოქალაქო რეესტრის ცხელ ხაზზე.

ოპოზიციურმა პარტიებმა და სამოქალაქო სექტორის წარმომადგენლებმა ერთობლივ დეკლარაციას მოაწერეს ხელი, რომელიც სამ ძირითად მოთხოვნას ითვალისწინებს - ჩატარდეს ვადამდელი საპრეზიდენტო და საპარლამენტო არჩევნები, შეიქმნას სათანადო პირობები თავისუფალი და სამართლიანი არჩევნებისთვის. დეკლარაციაზე შემდეგმა პარტიებმა მოაწერეს ხელი - "ხალხის პარტია", "კონსერვატიული პარტია", "რესპუბლიკური პარტია", "ახალი მემარჯვენეები", "ქალთა პარტია", "საქართველოს გზა", "მრეწველები", "დემოკრატიული მოძრაობა - ერთიანი საქართველო", აგრეთვე - ყოფილი გაერთიანებული ოპოზიციის ყოფილმა ლიდერმა, ლევან გაჩეჩილაძემ.

მემორანდუმს ხელს არ აწერენ "ლეიბორისტები"; ისინი პარლამენტს ნოტარიული წესით დამოწმებულ საიმპიჩმენტო დოკუმენტს წარუდგენენ.

გია ცაგარეიშვილი კი, დეკლარაციას არ იცნობს, რადგან "პარტიისთვის იგი არავის შეუთავაზებია". დეპუტატი ვადამდელი არჩევნების ჩატარების მოთხოვნას უერთდება.

"ეროვნული ფორუმის" ერთ-ერთი ლიდერი ირაკლი მელაშვილი აცხადებს, რომ "დეკლარაციის გაფორმება, პრეზიდენტის გადადგომის მოთხოვნით, განვლილი ეტაპია".

ირაკლი ალასანია ოპოზიციის პრინციპებს იზიარებს; მემორანდუმის მიზნების მისაღწევად, სტრატეგიასა და გეგმას ოპოზიციასთან კონსულტაციების შემდეგ ჩამოაყალიბებს.

“მოძრაობა სამართლიანი საქართველოსთვის“ ლიდერი, ზურაბ ნოღაიდელი, აცხადებს, რომ  
"ვადამდელი საპრეზიდენტო და საპარლამენტო არჩევნები დღის წესრიგში ძალიან მალე დადგება, ჯერ ეს არ არის საზოგადოებრივი შეკვეთა და დოკუმენტს ხელი ამიტომაც არ მოვაწერეთ". 
  
    

"სეპარატისტულ აფხაზეთში დაგეგმილი რუსული ბაზების მშენებლობის ფარგლებში, შესაძლოა, გუდაუთაში რუსეთის საჰაერო ძალების ბაზა განთავსდეს", იტყობინება "ინტერფაქსი" სამხედრო-დიპლომატიურ წყაროზე დაყრდნობით - "ბომბორას აეროდრომზე რუსული საჰაერო დაჯგუფების განთავსების საკითხი განიხილება აფხაზურ მხარესთან, ოჩამჩირეში შავი ზღვრის ფლოტის გემების ბაზის შექმნის პარალელურად".

საქართველოს პრეზიდენტი სოფელ თელეთში ახალი სანაშენე ფერმის გახსნას დაესწრო; მიხეილ სააკაშვილმა ფერმა დაათვალიერა და გაესაუბრა იქ მომუშავე ადამიანებს. მისი განცხადებით, მსოფლიო კრიზისის ფონზე აუცილებელია, რომ მსგავსმა ფერმებმა აქტიურად იმუშაონ. ფერმა ორიენტირებულია რძის წარმოებასა და საქონლის გამრავლებაზე, დასაქმებულია ორმოცი ადგილობრივი მკვიდრი და ხელმძღვანელობის განცხადებით, კიდევ ორმოცდაათი დასაქმდება.

"ევროკავშირი მხარს უჭერს ეუთო-ს ძალისხმევას, მოძებნოს გზა, რათა საქართველოში "უმნიშვნელოვანესი სამუშაო" განაგრძოს", ეს განცხადება ჩეხეთის საგარეო საქმეთა მინისტრმა, კარელ შვარცენბერგმა გააკეთა. კენჭისყრაში მონაწილე 56 სახელწმიფოს წარმომადგენლებმა ვერ შესძლეს ერთიანი პოზიციის შემუშავება, რომ საქართველოში ეუთო-ს მისიის მანდატი აღდგენილიყო. ეუთო-ს ბერძნული თავმჯდომარეობა ამჟამადაც აწარმოებს მოლაპარაკებებს საქართველოში მისიის მანდატის ფუნქციონირების აღდგენისთვის. "ევროკავშირი საქართველოში მოვალეობების შესრულების გაგრძელებას აპირებს, მაგრამ ეს ვალდებულება ვერ შეცვლის იქ ეუთო-ს მისიის არსებობასა და ფუნქციონირებას. ჩვენ ვხედავთ, რომ ორივე მისია ერთმანეთს ავსებს", აცხადებს შვარცენბერგი.

ქართველ მეწარმეებსა და ექსპორტიორებს საშუალება ეძლევათ, სტამბულში დაგეგმილ საერთაშორისო გამოფენაში მიიღონ მონაწილეობა. ეკონომიკური განვითარების სამინისტროს ინფორმაციით, საერთაშორისო ტურისტული გამოფენა 12-15 თებერვალს გაიმართება; მასში 50 ქვეყნის 3 000-მდე კომპანია  მიიღებს მონაწილეობას. გამოფენაზე, ტურიზმის სექტორში დასაქმებულ კომპანიებთან ერთად, წარმოდგენილი იქნებიან კვების პროდუქციის, ალკოჰოლური და არაალკოჰოლური სასმელების მწარმოებლებიც.

საერთაშორისო ორგანიზაცია "იუნესაიტი" ავრცელებს ინფორმაციას, რომ თამარაშენში ივანე მაჩაბლის სახლ-მუზეუმი განადგურებულია, რასაც ოკუპირებულ ცხინვალის რეგიონში ორგანიზაციის მიერ თანამგზავრის მეშვეობით გადაღებული ფოტოები ადასტურებს. იმის გამო, რომ აღნიშნულ ტერიტორიაზე ქართველი სპეციალისტების შესვლა შეუძლებელია, გადარჩენილი ნივთების მუზეუმიდან გამოტანა ვერ ხერხდება. საქართველოს კულტურის სამინისტრომ შენობას ორჯერ ჩაუტარა რესტავრაცია. აღდგენილი მუზეუმი პირველად სეპარატისტებმა აგვისტოს ომამდე დააზიანეს, რის გამოც ხელახალი აღდგენა გახდა საჭირო. რუსეთ-საქართველოს ომის დროს კი, მთლიანად განადგურდა. რაც შეეხება ოკუპირებულ ტერიტორიაზე მდებარე კულტურის სხვა ძეგლებს, მათი მდგომარეობის  შესახებ ჯერ არაფერია ცნობილი.

რუსეთის საგარეო საქმეთა მინისტრმა და სოხუმის მარიონეტული რეჟიმის ლიდერმა რუსეთსა და აფაზეთს შორის სრულფორმატიანი სახელმწიფოთაშორისი თანამშრომლობის დამყარების საკითხი განიხილეს; როგორც რუსეთის საგარეო პოლიტიკური უწყების ოფიციალური ვებგვერდი იუწყება, შეხვედრა მოსკოვში 29 იანვარს შედგა. სერგეი ლავროვმა და სერგეი ბაღაფშმა ორმხრივი შეთანხმებების პროექტების მომზადების მიმდინარეობაზე იმსჯელეს, კერძოდ - უსაფრთხოების სფეროში, ასევე - კავკასიაში არსებულ ვითარებასთან დაკავშირებულ საერთაშორისო ასპექტებზე, გაერო-ს უშიშროების საბჭოზე აფხაზეთის ყოფნის ახალი პარამეტრებისა და ჟენევის დისკუსიების მომდევნო რაუნდის საკითხებზე.

თბილისის მერმა, დიდუბის რაიონში, ბეტონის ქარხანა მოინახულა, რომელიც მერიის ინიციატივითა და დაკვეთით დედაქალაქის გზებისთვის ბეტონის თვალამრიდ ქვებს დაამზადებს; ქალაქის მთავრობას მსგავსი პროდუქციის შემოტანა ჩინეთიდან უხდებოდა. "ოშკი+" ქართულ ბაზარზე სამი წლის წინ დამკვიდრდა და წარმოების პროცესში აქტიურადაა ჩართული. 
 

მსოფლიო ბანკის დელეგაცია, მსოფლიო ბანკის ვიცე-პრეზიდენტის ევროპისა და ცენტრალური აზიის რეგიონში შიგეო კაცუს მეთაურობით, შეხვედრებს გამართავს სახელმწიფო მინისტრთან რეგიონული საკითხების დარგში, ეროვნული ბანკის პრეზიდენტის მოვალეობების შემსრულებელთან და არასამთავრობო სექტორის წარმომადგენლებთან. დელეგაცია, გასული ორი დღის განმავლობაში, მაღალი დონის მოლაპარაკებებს აწარმოებდა მთავრობასთან, რომელსაც წარუდგინა სამხრეთ კავკასიაში ახალი რეგიონული დირექტორი ასად ალამი. მსოფლიო ბანკის დელეგაცია შეხვდა საქართველოს პრეზიდენტს, პირველ ვიცე-პრემიერსა და ფინანსთა, ეკონომიკისა და ჯანდაცვის მინისტრებს, ასევე - დონორი ორგანიზაციების წარმომადგენლებს.

ეკა ბესელია ხელისუფლებას საპატრიარქოს წინააღმდეგ მიზანმიმართული კამპანიის წარმოებაში ადანაშაულებს; როგორც "მოძრაობა ერთიანი საქართველოსთვის" ერთ-ერთმა ლიდერმა განაცხადა, "ხელისუფლება საპატრიარქოს წინააღმდეგ "თავისუფლების ინსტიტუტს" იყენებს, რომელსაც სასათბურე პირობები შეუქმნა; მათ მიზნად აქვთ დასახული ახალი, ჰიბრიდული ჯიშის ქართველების შექმნა. ისინი აწარმოებენ კამპანიას, რომელიც საპატრიარქოს პოზიციას, მონარქისტულ იდეასთან, სამეფო ქორწინებასთან და "დიდ ათეულთან" დაკავშირებით, უპირისპირდება. "თავისუფლების ინსტიტუტის" წარმომადგენლები ღიად გამოდიან და არ ფარავენ, დაიწყონ კონფრონტაცია საპატრიარქოსთან; ეს ყველაფერი კი ისე გააკეთონ, თითქოს საზოგადოება და საპატრიარქო ერთმანეთს უპირისპირდება".

სტრასბურგში რუსეთის მარცხს რუსული მედიაც აღიარებს; რამდენიმე გამოცემა წერს, რომ ევროსაბჭოს ახალი რეზოლუცია საერთაშორისო გაერთიანებაში რუსეთის ავტორიტეტის შელახვის ნიშანია. მიმომხილველების განცხადებით, საპარლამენტო ასამბლეამ საქართველოს ყველა მოთხოვნა გაითვალისწინა, რუსეთის კი - უგულვებელყო. ოფიციალური მოსკოვისთვის ყველაზე დიდი მარცხი რეზოლუციის ის პუნქტები გახდა, სადაც აღნიშნულია, რომ რუსეთმა აფხაზეთისა და ე. წ. სამხრეთ ოსეთის დამოუკიდებლობის აღიარების გადაწყვეტილება უკან უნდა გაიწვიოს. "ჯერ კიდევ 6 თვის წინ რუსეთის დელეგაცია საპარლამენტო ასამბლეის ერთ-ერთი ყველაზე გავლენიანი წევრი იყო, გუშინდელმა დებატებმა საპირისპირო აჩვენა, - წერს გავლენიანი "კომერსანტი", - რუსეთს ყოველთვის შეეძლო აღეკვეთა მისთვის არასასურველი რეზოლუციების მიღება, დღეს კი, ყოფილი მომხრეებიც და პარტნიორებიც მივიდნენ იმ დასკვნამდე, რომ მოსკოვის ინტერესების საჯაროდ დაცვა უხერხულია".

სახალხო დამცველის განცხადებით, სასჯელაღსრულების დეპარტამენტის მუდმივმოქმედი კომისია, რომელიც მსჯავრდებულთა ვადაზე ადრე გათავისუფლების საკითხებს განიხილავს, მხოლოდ ქაღალდზე არსებობს და რეალურად არ იკრიბება. სოზარ სუბარის თქმით, ჩატარდა აღნიშნული კომისიის სხდომა, სადაც შალვა რამიშვილის საკითხი განიხილეს; მიუხედავად თხოვნისა, რომ კომისიის შეკრების შესახებ სახალხო დამცველის აპარატისთვის ეცნობებინათ, რათა მათ მონიტორინგი განეხორციელებინათ, სასჯელაღსრულების დეპარტამენტის თავმჯდომარის მოვალეობის შემსრულებელმა თხოვნა არ გაითვალისწინა - "დავით ჭაკუამ სხდომის შესახებ არ გვაცნობა, რის გამოც დაირღვა სახალხო დამცველის მიმართ კანონით მინიჭებული უფლებები, არ არსებობს სხდომის ოქმებიც". სოზარ სუბარი დეპარტამენტის თავმჯდომარის მოვალეობის შემსრულებლის დაჯარიმებას ითხოვს.

ბელორუსის პარლამენტი საგაზაფხულო სესიაზე აფხაზეთისა და ე. წ. სამხრეთ ოსეთის სეპარატისტული რეგიონების დამოუკიდებლობის აღიარების საკითხის განხილვას აპირებს. საქართველოს საგარეო საქმეთა მინისტრის მოადგილე დავით ჯალაღანიას განცხადებით, წინასწარი შეფასების გაკეთება შეუძლებელია, მაგრამ მსჯელობა და განხილვა არ ნიშნავს, რომ აღიარება აუცილებლად მოხდება - "საქართველოს ესმის, თუ რა დიდი წნეხის ქვეშ იმყოფება ბელორუსი რუსეთის მხრიდან, რადგან მისი ეკონომიკა სრულად არის მიბმული რუსულ გაზზე". ქართული მხარე იმედს გამოთქვამს, რომ ბელორუსის პარლამენტი გონივრულ გადაწყვეტილებას მიიღებს და არ დაუშვებს სეპარატისტული რეგიონების დამოუკიდებლობის აღიარებას. 

გაერო-ში რუსეთის მუდმივი წარმომადგენლის, ვიტალი ჩურკინის, განცხადებით, "რუსი დიპლომატები ქართველ კოლეგებთან შესახვედრად მზად არიან, თუ მათ, რა თქმა უნდა, ამის სურვილი აქვთ; თუ ქართველი დიპლომატები აქ, ნიუ-იორკში, ჩვენთან შეხვედრას მოინდომებენ, ჩვენ მათგან დამალვას არ ვაპირებთ".

ქართული მხარე რუსეთთან კონსტრუქციული, შედეგზე ორიენტირებული დიალოგისთვის მზად არის; ამის შესახებ საგარეო საქმეთა მინისტრის მოადგილე დავით ჯალაღონიამ განაცხადა - "ამისთვის სამი უბრალო პირობა არსებობს - რუსეთის მიერ საქართველოს ტერიტორიული მთლიანობის, სუვერენიტეტისა და დამოუკიდებლობის აღიარება". 

საქართველოს საგარეო საქმეთა მინისტრ გრიგოლ ვაშაძის ესპანეთში ვიზიტს საგარეო უწყებაში წარმატებულად და შედეგიანად აფასებენ. ოფიციალური შეხვედრების დროს ორ ქვეყანას შორის მჭიდრო თანამშრომლობის, აგრეთვე - რუსეთის მიერ ოკუპირებულ ტერიტორიებზე არსებული ვითარებისა და საერთაშორისო მონიტორინგის ჩატარების აუცილებლობის საკითხები განიხილეს. ესპანურმა მხარემ დაადასტურა, რომ საქართველოში ესპანეთის საელჩო გაიხსნება.

მინისტრთა კაბინეტის კანდიდატურების სია პარლამენტში შევიდა და ბიუროს წარედგინა; კომიტეტებში განხილვის შემდეგ, კანონმდებლები პრემიერ-მინისტრის თანამდებობაზე - ნიკა გილაურის, ფინანსთა მინისტრის - კახა ბაინდურაშვილის, რეგიონული განვითარებისა და ინფრასტრუქტურის მინისტრის - დავით ტყეშელაშვილის, სასჯელაღსრულებისა და პრობაციის მინისტრის - დიმიტრი შაშკინის კანდიდატურებს განიხილავენ. პარლამენტის ნდობის მისაღებად საჭიროა პარლამენტის სრული  შემადგენლობის უმრავლესობის მხარდაჭერა.

ოფიციალური მოსკოვი სეპარატისტულ აფხაზეთთან ხელმოსაწერად 20-მდე ხელშეკრულებას ამზადებს. რუსეთის ფედერაციის საგარეო საქმეთა მინისტრი სერგეი ლავროვი აცხადებს, რომ "აფხაზეთისა და სამხრეთ ოსეთის დამოუკიდებლობის აღიარება სუვერენული საქმეა. რა თქმა უნდა, დაინტერესებულნი ვართ, რომ ჩვენი პარტნიორები ამ ნაბიჯზე წავიდნენ, მათ ეს კარგად იციან. თუმცა, მათზე ზეწოლის მოხდენა არ  შეგვიძლია და არ მოვახდენთ, რაზეც არაერთხელ განვაცხადეთ". მისი განმარტებით, ოფიციალური აღიარების არარსებობა ხელს არ შეუშლის კოლექტიური უსაფრთხოების ორგანიზაციის წევრებს სოხუმთან და ცხინვალთან ურთიერთობების დამყარებაში.

ევროკავშირის საგარეო და პოლიტიკური უსაფრთხოების უმაღლესი კომისრის - ჰავიერ სოლანას განცხადებით, რუსეთ-საქართველოს ომის შემდეგ, ევროკავშირი სამხრეთ კავკასიის უსაფრთხოების საკითხებს დიდ მნიშვნელობას ანიჭებს - "საქართველოს კრიზისმა აჩვენა, რომ გადაუჭრელი კონფლიქტები წლების შემდეგაც კი საშიშია და კონფლიქტის საომარი გზით გადაწყვეტა - მიზანშეწონილი არ არის. ევროკავშირს სურს, ითანამშრომლოს არა მარტო რეგიონის ქვეყნებთან, არამედ - რუსეთთან, თურქეთთან და აშშ-სთანაც. ორგანიზაციას სტაბილურობის ძირითად გზად ყველა მხარესთან კონსტრუქციული დიალოგის გაგრძელება მიაჩნია".  

ქართული მხარე სამხედრო შეიარაღებიდან კასეტური ბომბების ამოღებას, შესაბამის საერთაშორისო კონვენციასთან მიერთებას და ევროპელი პარლამენტარების რეკომენდაციების გათვალისწინებას არ აპირებს. დეპუტატ გოკა გაბაშვილის განცხადებით, სანამ საქართველოს ტერიტორიები რუსეთის მიერ არის ოკუპირებული, საქართველო კასეტური ბომბების გამოუყენებლობის შესახებ საერთაშორისო კონვენციას არ შეურთდება". აღნიშნულ კონვენციასთან საქართველოს მიერთების საკითხი ევროსაბჭოს საპარლამენტო ასამბლეაზე განხილვის ერთ-ერთი თემა იყო.

მიხეილ სააკაშვილი საქართველოს სახელმწიფო ენერგოსისტემის სადისპეტჩეროს ეწვია, საიდანაც მთლიანი საქართველოს ენერგოსისტემის მართვა ხორციელდება. პრეზიდენტი დაინტერესდა ენერგოსისტემაში არსებული ვითარებით; მან პასუხები ენერგეტიკის მინისტრისგან მოისმინა. როგორც მიხეილ სააკაშვილმა განაცხადა, ავარიებისა და გათიშვების ალბათობა მინიმუმამდე უნდა იქნას დაყვანილი. ალექსანდრე ხეთაგურის განმარტებით კი, "საქართველოს სახელმწიფო ელექტროსისტემა ავარიებისთვის ყოველთვის მზად იყო, არის და იქნება". 

ვენეციის კომისიის წევრებმა გენერალური პროკურატურისა და იუსტიციის სამინისტროს გაერთიანების შესახებ განხორციელებული საკონსტიტუციო ცვლილებები მოიწონეს, განაცხადა იურიდიულ საკითხთა საპარლამენტო კომიტეტის თავმჯდომარე პავლე კუბლაშვილმა. მისი თქმით, კომისიის ექსპერტებმა დაადასტურეს, რომ იუსტიციის სამინისტროს სისტემაში პროკურატურის შესვლა ევროპისთვის მისაღები მოდელია და რომ ამ მხრივ კითხვები არ აქვთ; მათი მიზანია, დარწმუნდნენ პროკურორის დამოუკიდებლობის სამართლებრივი გარანტიების არსებობაში, რაზეც ამომწურავი ინფორმაცია მიიღეს.

ლეგენდარული სპექტაკლი "ურიელ აკოსტა", რომელიც 1929 წლის 3 თებერვალს ქუთაის-ბათუმის დასმა დადგა,  80 წლის გახდა. საიუბილეო თარიღთან დაკავშირებით, სპექტაკლს მარჯანიშვილის თეატრის დიდი სცენა დაეთმო.

როგორც საქართველოს პრეზიდენტმა განაცხადა, ახალმა პრემიერ-მინისტრმა წარადგინა მთავრობის უცვლელი შემადგენლობა იმ გამონაკლისით, რომ ფინანსთა მინისტრი ფინანსთა მინისტრის პირველი მოადგილე კახა ბაინდურაშვილი გახდება. მისი თქმით, მთავრობას ემატება პენიტენციალური სამინისტრო და იგი მიესალმება მინისტრის თანამდებობაზე დიმიტრი შაშკინის კანდიდატურის წარდგენას, რომელიც ამერიკის რესპუბლიკური ინსტიტუტის ადგილობრივ ხელმძღვანელად მუშაობს - პარტიებს შორის დიალოგის საკითხზე. სააკაშვილის განმარტებით, მნიშვნელოვანია დიალოგი ყველაზე პატარა ჯგუფებს შორის, მათ შორის - რადიკალებსა და ზომიერ ჯგუფებს შორის და ერთ-ერთი